தஞ்சாவூர்; தஞ்சாவூர் மாவட்டம் கும்பகோணம் அருகே நாச்சியார்கோவிலை சேர்ந்த விக்னேஷ்,43, இவர், சுவாமிநாதன் கலைக்கூடம் என்ற பெயரில் சுவாமி சிலைகள், பித்தளை குத்துவிளக்குகள், கோவில் மணிகள் போன்றவற்றை தயார் செய்து வருகிறார். இந்நிலையில், கடந்தாண்டு மலேசியா நாட்டின் கிலாங்கில், சுப்பிரமணிய சுவாமி கோவிலில் பிரதிஷ்டை செய்வதற்காக வேல் வடிவமைக்க வேண்டும் என கோவில் நிர்வாகம் சார்பில், முடிவு செய்யப்பட்டது. இதற்காக விக்கேனஷிடம் கோவில் நிர்வாகத்தினர் வேல் செய்ய ஆடர் கொடுத்தனர். இதில், 15 அடி உயரத்தில், ஓம் மற்றும் மயில் உருவம் பொறித்த வெண்கலத்தாலான வேல் வடிவமைக்கப்பட்டு, அடுத்த மாதம் அந்த நாட்டிற்கு அனுப்பி வைக்கப்படவுள்ளன. 

இது குறித்து விக்னேஷ் கூறியதாவது:  மலேசியாவில், கிலாங் நகரில், சுப்பிரமணிய சுவாமி கோவில், மலேசிய தமிழர்களின் நிர்வாகத்தின் கீழ் உள்ளது. இக்கோவிலில், வரும் 2025ம் ஆண்டு பிப்., மாதம் கும்பாபிஷேகம் செய்ய உள்ளனர். இதற்காக கோவிலில், பிரமாண்டமான வகையில் வேல் ஒன்றை பிரதிஷ்டை செய்ய முடிவு செய்தனர். இந்த வேலின் மேல் பாகம் மட்டும், 175 கிலோ எடையில் 15 அடி உயரத்தில் தயார் செய்யப்பட்டுள்ளது. இந்த வேல் அடுத்த மாதம் முதல் வாரத்தில் அனுப்பி வைக்கப்படவுள்ளன. மேலும், வெண்கலத்தில், 55 அடி உயரத்தினாலான குழாயுடன், அந்த 15 அடி உயரம் உள்ள வேலை இணைத்து மொத்தம் 70 அடி உயரத்தில், பொருத்தப்பட உள்ளது இவ்வாறு அவர் கூறினார்.