சிவகங்கை: சிவகங்கை அருகே கண்டுபிடிக்கப்பட்ட 10ம் நுாற்றாண்டு புத்தர் சிலையை தொல்லியல் துறையினர் மீட்டு பாதுகாக்க வேண்டுமென, கோரிக்கை எழுந்து உள்ளது. சிவகங்கை மாவட்டத்தில் மகிபாலன்பட்டி, இளையான்குடி, பிரான்மலை, குன்றக்குடி, திருக்களாக்குடி, பூலாங்குறிச்சி, திருமலை, அனுமந்தங்குடி உள்ளிட்ட இடங்களில் சமணர்கள் வாழ்ந்த அடையாளங்கள் உள்ளன. புத்த மதத்தினர் வாழ்ந்ததாக கூறப்பட்டாலும், அதற்கான அடையாளம் கண்டுபிடிக்காமல் இருந்தன.தற்போது சிவகங்கை அருகே மல்லல் புஞ்சை காட்டு பகுதியில் புத்தர் சிலை கண்டுபிடிக்கப்பட்டுள்ளது. கற்சிலையான இது 10 ம் நுாற்றாண்டைச் சேர்ந்தது. அமர்ந்தபடி தியான நிலையில் புத்தர் உள்ளார். மூன்றடி உயரமும், இரண்டே கால் அடி அகலமும் கொண்டது. பல ஆண்டுகள் பராமரிப்பின்றி இருந்ததால் முகம் பாவனைகள் மறைந்து உள்ளன. வலதுபுற காதும் சேதமடைந்துள்ளது.அந்த சிலையை தொல்லி யல்துறையினர் மீட்டு பாதுகாக்க வேண்டுமென, கோரிக்கை எழுந்துள்ளது.

மல்லல் ஆர்.பாக்யநாதன் கூறியதாவது: கோயில் கட்டி புத்தர் சிலை வைக்கலாம் என, எண்ணியிருந்தோம். சிலர் எதிர்ப்பு தெரிவித்ததால் கோயில் கட்டவில்லை. வெயில், மழையில் சிலை சேதமடைந்து வருகிறது, என்றார். சிவகங்கை அரசு அருங்காட்சியக காப்பாட்சியர் டி.பக்கிரிசாமி கூறியதாவது: கிராம மக்கள் தகவல் அடிப்படையில் சிலையை ஆய்வு செய்தோம். புத்தர் சிலைக்கான அடையாளங்கள் உள்ளன. புத்தர் சிலைகள் பொதுவாக தியான நிலையில் தான் இருக்கும். இது பத்தாம் நுாற்றாண்டைச் சேர்ந்தது. அதை அருங்காட்சியகத்திற்கு கொண்டு வர கலெக்டர் மூலம் நடவடிக்கை எடுத்து வருகிறோம், என்றார்.