ஸ்ரீவில்லிபுத்தூர் : ஆண்டாள் குறித்து சர்ச்சை கருத்தை தெரிவித்த வைரமுத்து மன்னிப்பு கேட்க வேண்டும் என ஸ்ரீவில்லிபுத்தூர் மணவாள மாமுனிகள் மடத்தின் ஜீயர் இருந்து வரும் உண்ணாவிரதம் இன்று(ஜன.,18) இரண்டாவது நாளாக தொடர்கிறது. ஆண்டாள் குறித்து வைரமுத்து சர்ச்சைக்குரிய வகையில் கருத்து தெரிவித்து இருந்தார். இதனை கண்டித்து இந்து அமைப்புக்கள் வைரமுத்துவுக்கு எதிராக போராட்டம் நடத்தி வருகின்றன. வைரமுத்து மீது விருதுநகர் மற்றும் சென்னையில் வழக்குப்பதிவு செய்யப்பட்டுள்ளது.

இந்நிலையில் வைரமுத்துவுக்கு எதிராக, ’வாழ்க இந்து நீதி தர்மம்’ எனும் தலைப்பில் ஜீயர்கள், மடாதிபதிகள், சிவாச்சாரியார்கள், இந்து அமைப்புகள், ஆன்மிக நல விரும்பிகள் பங்கேற்ற பிரமாண்ட கூட்டம், சென்னை, அரசு விருந்தினர் மாளிகை அருகே நேற்று நடந்தது. அதில் வைரமுத்து மன்னிப்பு கேட்காவிட்டால் மெரீனாவில் மீண்டும் ஒரு போராட்டம் வெடிக்கும் என எச்சரிக்கப்பட்டது. இதற்கிடையில், வைரமுத்து ஸ்ரீவில்லிபுத்தூர் ஆண்டாள் சன்னதிக்கு நேரில் வந்து மன்னிப்பு கேட்க வேண்டும் என ஸ்ரீவில்லிபுத்தூர் மணவாள மாமுனிகள் மடத்தின் ஜீயர் சுவாமிகள் கூறி இருந்தார். ஆனால் தற்போது வரை வைரமுத்து ஆண்டாள் சன்னதிக்கு நேரில் வந்து மன்னிப்பு கேட்காததால் நேற்று காலை முதல் உண்ணாவிரத போராட்டத்தை துவக்கினார். இந்நிலையில் இரண்டாவது நாளாக இன்றும் உண்ணாவிரதத்தை ஜீயர் தொடர்கிறார்.

பேச்சுவார்த்தை: உண்ணாவிரதத்தை கைவிடக்கோரி, அறநிலை துறை உதவி கமிஷனர் ஹரிஹரன் மற்றும் டிஎஸ்பி ரவிச்சந்திரன் ஜீயர் சுவாமிகளுடன் பேச்சுவார்த்தை நடத்தினர்.