மதுரை: மீனாட்சி அம்மன் கோவிலில், தீ விபத்தால் சேதமடைந்த வீரவசந்தராய மண்டப புனரமைப்பு பணி, 15 நாட்களில் துவங்கும், என, மதுரையில் உயர்மட்ட குழு தலைவர், பாலசுப்பிரமணியன் தெரிவித்தார். இக்கோவிலில், பிப்., 2ல் தீ விபத்து ஏற்பட்டது. இதில், வீரவசந்தராய மண்டப மேற்கூரை, பழங்கால கற்துாண்கள் சேதமாயின.

2வது கட்ட ஆய்வு : விபத்திற்கான காரணத்தை அறியவும், புனரமைப்பு பணி மேற்கொள்ளவும் பொதுப்பணித் துறையின் ஓய்வுபெற்ற பொறியாளர் பாலசுப்பிரமணியன் தலைமையில், 12 பேர் கொண்ட உயர் மட்ட குழுவை, அறநிலையத் துறை நியமித்தது. இக்குழுவினர், கடந்த, 8ல் முதற்கட்ட ஆய்வு நடத்தினர். நேற்று காலை, 10:45 மணிக்கு, இரண்டாவது கட்ட ஆய்வு துவங்கியது. பழைய மண்டபத்தின் நிலை குறித்த ஆவண படத்தை வைத்து, எப்படி மீண்டும் அதே நிலைக்கு புனரமைப்பது என, ஆலோசனை நடத்தினர். பின், சேதம்அடைந்த மண்டப பகுதிகளை, மதியம், 2:00 மணி வரை ஆய்வு நடத்தினர்.

ஆவணப்படம் : உயர்மட்ட குழு தலைவர், பாலசுப்பிரமணியன் கூறியதாவது:வீரவசந்தராய மண்டபத்தின் புனரமைப்பு பணிக்காக, ஆவணப்படம் தயாரித்துள்ளோம். ஆயிரங்கால் மண்டபத்திற்கு பாதிப்பு இன்றி, இடிபாடுகளை அகற்றுகின்றனரா என, ஆய்வு செய்யப்பட்டது. மண்டபத்தில் நான்கு கற்துாண்கள், மேற்கூரை, பக்கவாட்டு சுவர்கள் மட்டுமே சேதமடைந்து உள்ளன. கோவில் நிதியில், புனரமைப்பு பணி, 15 நாட்களில் துவங்கும். இதற்கான ஆய்வு அறிக்கை நகல், அறநிலையத் துறை கமிஷனருக்கு அளிக்கப்பட்டுள்ளது.இவ்வாறு அவர் கூறினார்.