விருத்தாசலம்: விருத்தாசலம் விருத்தகிரீஸ்வரர் கோவில் மாசிமக பிரம்மோற்சவ விழாவில், இன்று பஞ்சமூர்த்திகள் தனித்தனி தேர்களில் வீதியுலா வந்து அருள்பாலித்தனர். கடலுார் மாவட்டம், விருத்தாசலம் விருத்தகிரீஸ்வரர் கோவிலில் மாசிமக பிரம்மோற்சவ விழா, கடந்த 20ம் தேதி கொடியேற்றத்துடன் துவங்கியது. தினசரி காலை ஆழத்து விநாயகர், விருத்தகிரீஸ்வரர், அம்பாள் (பாலாம்பிகை, விருத்தாம்பிகை), சண்முக சுப்ரமணியர், சண்டிகேஸ்வரர் உள்ளிட்ட பஞ்சமூர்த்திகளுக்கு சிறப்பு அபிேஷக ஆராதனை, பல்லக்கில் வீதியுலா, இரவு சூரிய பிரபை, பூதம், நாகம், யானை, கமல வாகனங்களில் சுவாமிகள் வீதியுலா வந்து அருள்பாலித்தனர்.

முக்கிய நிகழ்வாக, ஒன்பதாம் நாள் உற்சவமாக இன்று தேரோட்டம் நடந்தது. இதையொட்டி, அதிகாலை 4:30 மணியளவில் பஞ்சமூர்த்திகளுக்கு சிறப்பு அபிேஷக ஆராதனை நடந்தது. தேரடியில் அலங்கரித்த திருத்தேர்களில் பஞ்சமூர்த்திகள் அதிகாலை 5:15 மணியளவில் வைக்கப்பட்டு, சிறப்பு பூஜை நடந்தது. தொடர்ந்து, காலை 6:20 மணிக்கு ஆழத்து விநாயகர் தேர் புறப்பட்டது. ஆயிரக்கணக்கானோர் நமசிவாய கோஷமிட்டு, தேரை வடம் பிடித்து இழுத்து வந்தனர். தொடர்ந்து, சண்முக சுப்ரமணியர், விருத்தகிரீஸ்வரர், அம்பாள், சண்முக சுப்ரமணியர் தேர்களும் ஒன்றன் பின் ஒன்றாக தேரோடும் வீதிகளில் வீதியுலா வந்தன. பல ஆயிரக்கணக்கானோர் தேரை வடம் பிடித்து இழுத்து, நேர்த்திக்கடன் செலுத்தினர். நாளை மறுநாள் 11ம் நாள் உற்சவமாக நகராட்சி நிர்வாகம் சார்பில் அம்மன் குளத்தில் தெப்ப உற்சவம், 12ம் நாள் நிறைவாக சண்டிகேஸ்வரர் ரிஷப வாகனத்தில் வீதியுலா வரும் நிகழ்ச்சி நடக்கிறது.