திருப்பூர்: விஸ்வேஸ்வரசுவாமி மற்றும் வீரராகவப்பெருமாள் கோவில்களில், வைகாசி விசாக தேர்த்திருவிழா கொடியேற்றம் நடந்தது. இதையொட்டி, நகரின் காவல் தெய்வமான செல்லாண்டியம்மன் கோவில் சிறப்பு அபிஷேகம், அலங்கார பூஜைகள் மற்றும் இரவு கிராம சாந்தி நிகழ்ச்சி நடந்தது.

நேற்று (மே22)ல் இரு கோவில்களிலும் திருவிழா கொடியேற்றம் நடந்தது. வீரராகவ பெருமாள் கோவிலில், சிறப்பு யாக பூஜை, அபிஷேகம், அலங்கார பூஜைகள் நடந்தன. தொடர்ந்து, கோவில் கொடி மரத்தில், கொடியேற்றப்பட்டது. விஸ்வேஸ்வரசுவாமி கோவில், சிவாச்சார்யார்கள் வேத மந்திரங்கள் முழங்க சிறப்பு யாக பூஜை, அபிஷேகம், அலங்கார பூஜை நடந்தது. பக்தர்களின் ‘ஓம் நமசிவாயா’ கோஷம், மேள வாத்தியம் முழங்க, கொடியேற்றம் நடந்தது. அதன்பின், பூமி நீளா தேவி தாயார், கனகவல்லி தாயார் சமேத வீரராகவப்பெருமாள் கருட வாகனத்தில் எழுந்தருளினார். அதேபோல், சோமாஸ்கந்தர் ரூபத்தில் எம்பெருமான் ரிஷப வாகனத்தில் எழுந்தருளி, தேர் வீதிகளில் திருவீதி உலா வந்து, பக்தர்களுக்கு அருள் பாலித்தனர்.