காஞ்சிபுரம்: காஞ்சிபுரம் குமர கோட்டத்தில் விற்கப்படும், நெய் தீபத்தில், தரமற்ற கலப்பட நெய் பயன்படுத்துவதாக பக்தர்கள் குற்றம் சாட்டுகின்றனர். காஞ்சிபுரம் காமாட்சியம்மன் கோவிலுக்கும், ஏகாம்பரநாதர் கோவிலுக்கும், மத்தியில் சோமாஸ்கந்த மூர்த்தமாக, குமரகோட்டம் சுப்பிரமணியசுவாமி கோவில் விளங்குகிறது.

இந்து சமய அறநிலையத்துறையின் பராமரிப்பில் உள்ள இக்கோவிலில், 19 முதல், வைகாசி விசாகப் பெருவிழா நடந்து வருகிறது. இதனால், பக்தர்களின் கூட்டம் அதிகரித்து வருகிறது. பக்தர்கள் வேண்டுதலுக்காக, நெய்தீபம் ஏற்றி வழிபடுகின்றனர். இதற்காக, கோவில் நிர்வாகம் சார்பில், அகல் விளக்கு நெய் தீபம் ஒன்று, 2 ரூபாய்க்கு விற்கப்படுகிறது. பக்தர்கள் அவரவர் விருப்பப்படி தங்களுக்கு தேவையான எண்ணிக்கையில், நெய் தீபம் வாங்கி செல்கின்றனர். கடந்த சில மாதங்களாக, தரமற்ற, கலப்பட நெய், தீபத்திற்கு பயன்படுத்துவதாக குற்றச்சாட்டு எழுந்துள்ளது. இங்கு வழங்கப்படும், நெய் தீபத்தில் உள்ள நெய், பசை போல உள்ளது. மேலும், தீபம் எரியும்போது, நெய் மணம் வீசாமல், ஒரு விதமான கெட்ட வாடை வீசுகிறது. தரமான நெய் பயன்படுத்த வேண்டும் என்ற கோரிக்கை எழுந்துள்ளது.