செஞ்சி : மேல்மலையனூர் அங்காளம்மன் கோவிலில் நேற்று நடந்த முடி சேகரிப்பு மறு ஏலத்தில், கடந்த ஏலத்தை விட 31 லட்சம் ரூபாய் அதிகரித்து 70 லட்சம் ரூபாய்க்கு ஏலம் போனது. விழுப்புரம் மாவட்டம் மேல்மலையனூர் அங்காளம்மன் கோவிலில் பக்தர்கள் காணிக்கையாக செலுத்தும் முடியை சேகரிப்பதற்கு ஒரு ஆண்டுக்கான டெண்டர் கடந்த மாதம் 11ம் தேதி நடந்தது. இதில் பச்சையப்பன் என்பவருக்கு 39 லட்சம் ரூபாய்க்கு ஏலம் முடிவானது. இந்த ஏலத்தில் கலந்து கொண்ட பரமசிவம் என்பவர், தான் கேட்ட 47 லட்சம் ரூபாய் ஏலத்தொகையை விட குறைவாக ஏலம் கேட்டவருக்கு ஏலத்தை ஒதுக்கியதாக இந்து அறநிலையத்துறை ஆணையரிடம் புகார் செய்தார். அத்துடன் மறு ஏலம் நடத்த கோரி 47 லட்சம் ரூபாய்க்கான டி.டி.,யையும் உடன் இணைத்திருந்தார். இதையடுத்து ஆணையரின் உத்தரவுப்படி மேல்மலையனூர் கோவில் வளாகத்தில் நேற்று மறுஏலம் நடந்தது. குறைந்தபட்ச ஏலத்தொகையாக 50 லட்சம் ரூபாய் முடிவு செய்திருந்தனர். இரண்டு மணிக்கு என அறிவித்திருந்த ஏலத்தை பகல் 3.20 மணிக்கு துவங்கினர்.
விழுப்புரம் இந்து சமய அறநிலையத்துறை உதவி ஆணையர் குமரதுரை ஏலத்தை நடத்தினார். மேல்மலையனூர் அங்காளம்மன் கோவில் உதவி ஆணையர் ஜோதி, ஆய்வாளர் முருகேசன் உடனிருந்தனர்.

அறங்காவலர் குழு தலைவர் மற்றும் அறங்காவலர்கள் டெண்டரில் கலந்து கொள்ளாமல் புறக்கணித்தனர். முதலில் பொது ஏலம் விடப்பட்டது. இதில் டிபாசிட் தொகையாக ஒரு லட்சம் ரூபாயை கட்டியிருந்த நான்கு பேர் ஏலம் கேட்டனர். பரமசிவம் என்பவர் 50 லட்சத்து 50 ஆயிரம் ரூபாய்க்கு ஏலம் கேட்டார். இதையடுத்து மூடி சீல் வைக்கப்பட்டிருந்த டெண் டர் பெட்டியை திறந்தனர். இதில் நான்கு டெண்டர்கள் இருந்தன. ஒன்றில் டிபாசிட் தொகைக்கான டி.டி., இல்லை. மற்ற மூன்றில் சந்திரன் 57 லட்சத்திற்கும், ஏழுமலை 55 லட்சத்திற்கும், சரவணன் 70 லட்சத்திற்கும் டெண்டர் கோரியிருந்தனர். அதிக தொகை கோரியிருந்த சரவணனுக்கு டெண்டரை ஒதுக்கீடு செய்வதாக, உதவி ஆணையர் குமரதுரை அறிவித்தார். இதில் சரவணனின் டெண்டரில் எழுத்தால் எழுபது லட்சம் என எழுத வில்லை என்பதால் டெண்டரை நிராகரிக்க வேண்டும் என ஏலத்தில் கலந்து கொண்டவர்கள் கேட்டனர். இதனை அதிகாரிகள் ஏற்கவில்லை. கடந்த மாதம் நடந்த ஏலத்தை விட தற்போது நடந்த மறு ஏலத்தில் 31 லட்சம் ரூபாய் அதிகமாக ஏலம் போய் உள்ளது. கடந்தாண்டு நடந்த ஏலத்தில் 39 லட்சத்திற்கு மட்டுமே ஏலம் போனது என்பது குறிப்பட தக்கது.