நிழல் கிரகங்களான ராகு, கேதுவுக்கு உருவம் கிடையாது. சூரியன், சந்திரனின் சுற்றுப்பாதையில் இவர்கள் சந்திக்கும் இரு புள்ளிகள் ராகு, கேது எனப்படுகிறது. வலமிருந்து இடமாகச் சுற்றும் இவர்கள் ஒரு ராசியில் ஒன்றரை ஆண்டு தங்கியிருப்பர். நேரெதிர் ராசியில் இருக்கும் இந்த கிரகங்கள் ஒரே நாளில் பெயர்ச்சியாவர். தற்போது கடகத்தில் இருக்கும் ராகு மிதுனத்திற்கும், மகரத்தில் இருக்கும் கேது தனுசுவிற்கும் இன்று(பிப்.,13) பகல் 2:02 மணிக்கு பெயர்ச்சியாகின்றனர். 2020 ஆக.31 வரை இவர்கள் இங்கு தங்கியிருப்பர். இதை முன்னிட்டு கும்பகோணம் அருகிலுள்ள திருநாகேஸ்வரம், வைத்தீஸ்வரன் கோவிலுக்கு அருகிலுள்ள கீழப்பெரும்பள்ளம் உள்ளிட்ட ராகு கேது கோயில்களில் லட்சார்ச்சனை, சிறப்பு யாகம், அபிஷேகம், ஆராதனை நடக்கும்.

ராகு:
நற்பலன்    :    மேஷம், சிம்மம், மகரம்
சுமார்    :    கன்னி, துலாம், தனுசு, கும்பம்
பரிகாரம்    :    ரிஷபம், மிதுனம், கடகம், விருச்சிகம், மீனம்

ஸ்லோகம் :
அர்த்த காயம் மகா வீர்யம்
சந்திரா தித்ய விமர்தனம்
ஸிம்ஹிகா கர்ப்ப ஸம்பூதம்
தம் ராஹும் ப்ரணமாம்யஹம்

பொருள்: பாதி உடலைக் கொண்டவரே! பெரும் வீரரே! சந்திர, சூரியரை கிரகணமாக பிடிப்பவரே! சிம்ஹிகையின் கர்ப்பத்தில் வந்தவரே! ராகுவே! உம்மை வணங்குகிறேன்.

கேது:
நற்பலன்    :    கடகம், துலாம், கும்பம்
சுமார்    :    மேஷம், மிதுனம், சிம்மம், மீனம்
பரிகாரம்    :    ரிஷபம், கன்னி, விருச்சிகம், தனுசு, மகரம்

ஸ்லோகம்:
பலாஸ புஷ்ப ஸங்காஸம்
தாரகா கிரஹ மஸ்தகம்
ரெளத்ரம் ரெளத்ராத் மகம் கோரம்
தம் கேதும் ப்ரணமாம்யஹம்

பொருள்: புரசம் பூவைப் போல சிவந்த நிறம் கொண்டவரே! நட்சத்திரங்கள், கிரகங்களில் தலையானவரே! கோபம் மிக்கவரே! கோர வடிவானவரே! கேது பகவானே! உம்மை வணங்குகிறேன். வாழ்வில் சாதனை படைக்க சாயாகிரகங்களான ராகு கேதுவை இன்று வழிபடுவோம்.