திருப்பரங்குன்றம், திருப்பரங்குன்றம் சுப்பிரமணிய சுவாமி கோயிலில் பங்குனித் திருவிழா கொடியேற்றத்துடன் நேற்று தொடங்கியது. மார்ச் 23ல் சுவாமி, தெய்வானை திருக்கல்யாணம் நடக்கிறது. நேற்று காலை கோயில் யானை தெய்வானைமீது கொடிப்பட்டம் வைத்து ரத வீதிகளில் எடுத்துச் செல்லப்பட்டு கோயில் கொடிக்கம்பத்தில் கட்டப்பட்டது. காலை 11:00 மணிக்கு சுவாமி, தெய்வானை கொடிக்கம்பம் முன் எழுந்தருளினர். சிவாச்சாரியார்கள் பங்குனி திருவிழாவிற்கான கொடியேற்றினர். கொடிகம்பத்தின் அடிப்பகுதியில் பால் உள்ளிட்ட திரவிய அபிஷேகங்கள் முடிந்து தீபாராதனை நடந்தது.

திருவிழா நம்பியார் சிவாச்சாரியாருக்கு பரிவட்டம் கட்டி மரியாதை செய்யப்பட்டது. திருவிழா நடக்கும் மார்ச் 25 வரை காலையில், தங்க சப்பரம், தங்க பல்லக்கு, இரவில் தங்கமயில், தங்க குதிரை, வெள்ளி பூத வாகனம், அன்னம், வெள்ளி யானை, வெள்ளி ஆட்டுக்கிடாய், பச்சைக்குதிரை வாகனங்களில் வீதி உலா நிகழ்ச்சியில் சுவாமி, தெய்வானை அருள்பாலிப்பர். திருவிழாவின் முக்கிய நிகழ்ச்சிகளாக மார்ச் 16 இரவு 7:00 மணிக்கு வெள்ளி யானை வாகனத்தில் சுவாமி கைபார நிகழ்ச்சியும், மார்ச் 17ல் சைவ சமய ஸ்தாபித வரலாற்று லீலை, மார்ச் 18 காலையில் கங்காளநாதர், இரவு சுவாமி, தெய்வானை, நடராஜர், சிவகாமி அம்பாள் புறப்பாடு, மார்ச் 19 பச்சை குதிரை ஓட்டம், மார்ச் 20 பங்குனி உத்திரம், மார்ச் 21 சூரசம்ஹார லீலை நடக்கிறது. மார்ச் 22 பட்டாபிஷேகம், மார்ச் 23 திருக்கல்யாணம், மார்ச் 24 தேரோட்டம், மார்ச் 25 தீர்த்த உற்ஸவம் நடக்கிறது.