திருப்பரங்குன்றம்: திருப்பரங்குன்றம் சரவணப் பொய்கையில் தண்ணீரை சுத்தப்படுத்தும் பணி நடக்கும் நிலையில் பொது மக்கள் ஒத்துழைக்க வேண்டும் என கோயில் நிர்வாகம் எதிர்பார்க்கிறது. சுப்பிரமணிய சுவாமி கோயில் கிழக்கில் மலையடிவாரத்தில் இப்பொய்கை உள்ளது. மழை பெய்தால் மட்டுமே நிரம்பும். பொய்கையிலிருந்து தண்ணீர் வெளியேற வழியில்லை.

இங்கு இருந்து தினமும் அதிகாலை தீர்த்தம் (திருமஞ்சனம்) எடுத்து யானையின் மீது கோயிலுக்கு கொண்டு செல்லப்படும். கொடி கம்ப அடிப்பகுதி, பலி பீடத்திற்கு அபிஷேகம் செய்யப்படும். கார்த்திகை திருவிழா, பங்குனி திருக்கல்யாண பட்டாபிஷேகத்தின் போது, முருகன் தங்க கிரீடத்திற்கு சரவணப் பொய்கை தண்ணீரால் அபிஷேகம் செய்யப்படும்.திருவிழா கடைசி நாட்களில் அஸ்தரதேவர் சரவணப் பொய்கையில் நீராடி தீர்த்தம் கொடுப்பது நடக்கும். சுற்றியுள்ள கோயில் கும்பாபிஷேகத்திற்கான யாகசாலை பூஜைக்காக பொய்கையிலிருந்து நீர் எடுத்துச் செல்லப்படும்.புனிதம் மிக்க பொய்கையில் அப்பகுதியினர் குளித்தும், துவைத்தும் வருகின்றனர். பழைய பாய், துணிகள், தலையணைகளை தண்ணீருக்குள் போடுகின்றனர். சோப்பு, சீகைக்காய் பவுடர், ஷாம்புகளை பயன்படுத்தி பாலிதீன் பாக்கெட்டுகளை தண்ணீரில் போடுகின்றனர். பொய்கையின் ஒரு பகுதி திறந்த வெளி கழிப்பிடமாக மாற்றப்பட்டு உள்ளது. இதனால் பொய்கை சுகாதார சீர்கேடு அடைந்து துர்நாற்றம் வீசுகிறது. குளித்தால் தோல் நோய் ஏற்படுகிறது. பொய்கையை சீரமைக்கவும், சுத்தப்படுத்தவும் மும்பை பாபா அணு ஆராய்ச்சி மைய விஞ்ஞானி டேனியல் செல்லப்பா ஆலோசனையின்படி முதற் கட்டமாக இயந்திரம் மூலம் தண்ணீர் சுத்திகரிக்கப்படுகிறது.தொடர்ந்து பல்வேறு தொழில்நுட்ப நடவடிக்கைகள் எடுக்கப்படவுள்ளன.அங்கு துவைப்பது, சோப்பு, ஷாம்பு, எண்ணெய் பயன்பாட்டை தவிர்த்து, குளிக்கமட்டுமே பொய்கையை பயன்படுத்த பொதுமக்கள் முன்வர வேண்டும் என கோயில் நிர்வாகம் கேட்டு கொண்டுள்ளது.