தோகைமலை கோவிலில் பழைய முருகன் சிலை மீண்டும் பிரதிஷ்டை
குளித்தலை: தோகைமலையில், பழமை வாய்ந்த மீனாட்சி சுந்தரேஸ்வரர் கோவிலில், நீதிமன்ற உத்தரவால், பழைய முருகன் சிலை பிரதிஷ்டை செய்யப்பட்டது.
கரூர் மாவட்டம், குளித்தலை அருகே தோகைமலையில், அறநிலையத்துறைக்கு சொந்தமான, 1,000 ஆண்டு பழமை வாய்ந்த மீனாட்சி சுந்தரேஸ்வரர் மற்றும் பாலதண்டாயுதபாணி கோவில் உள்ளது. இக்கோவிலில், 2025 நவ., 27ல் கும்பாபிஷேகம் நடந்தது. கும்பாபிஷேகத்திற்கு பின், கோவிலில் இருந்த பாலதண்டாயுதபாணி சிலை மாற்றப்பட்டு இருந்ததை கண்டு பக்தர்கள் அதிர்ச்சியடைந்தனர். அறநிலையத்துறை அதிகாரிகள், சிலை கடத்தல் தடுப்பு பிரிவு போலீசார், கோவிலில் ஆய்வு செய்தனர். அதில், அர்ச்சகர் கிருஷ்ணமுர்த்தி, மூலவர் சிலையை மாற்றியதை அறிந்தனர். பழைய சிலை, அருகில் இருந்த சுனையில் இருந்து கடந்த ஜன., 20ல், மீட்கப்பட்டது. கோவில் செயல் அலுவலர் புகாரில், தோகைமலை போலீசார் வழக்கு பதிந்து, ஆக., 18ல் கிருஷ்ணமுர்த்தியை கைது செய்தனர். இந்நிலையில், தோகைமலையை சேர்ந்த சங்கிலி முத்து, உயர் நீதிமன்ற மதுரை கிளையில் தொடர்ந்த வழக்கில், பழைய சிலையை மீண்டும் நிறுவ நீதிமன்றம் உத்தரவிட்டது. இதையடுத்து, நேற்று காலை பழைய சிலை பிரதிஷ்டை செய்யப்பட்டு, பூஜை நடந்தது.
