திருநீர்மலை ரங்கநாதர் கோவிலில் சித்திரை தேரோட்டம்; பக்தர்கள் வடம் பிடித்தனர்
திருநீர்மலை; பல்லாவரத்தை அடுத்த திருநீர்மலையில், பிரசித்திபெற்ற ரங்கநாத பெருமாள் கோவில் உள்ளது. இக்கோவிலில், ஆண்டுதோறும் பங்குனி மற்றும் சித்திரை மாதங்களில், தேர்த்திருவிழா நடைபெறும். இந்தாண்டு சித்திரை திருவிழா, கடந்த 13ம் தேதி துவங்கியது. விழாவின் ஏழாம் நாளான இன்று திருத்தேரோட்டம் நடந்தது. காலை 7:30 மணிக்கு, பக்தர்கள் வடம் பிடித்து தேரை இழுக்க துவங்கினர். மலை அடிவாரத்தில் இருந்து துவங்கிய தேரோட்டம் வடக்கு, தெற்கு, கிழக்கு மாட வீதிகள் வழியாக உலா வந்து, மீண்டும் கோவிலை அடைந்தது. திருத்தேரோட்டத்தில், 3,000க்கும் மேற்பட்ட பக்தர்கள் பங்கேற்றனர்.
