மகாளய அமாவாசை: நீர் நிலைகளில் குவிந்த மக்கள் புனித நீராடி முன்னோர்களுக்கு தர்ப்பணம்!
ராமேஸ்வரம்: மகாளய அமாவாசயை ஒட்டி, ராமேஸ்வரம் அக்னி தீர்த்த கடலில் அதிகாலை முதல் ஏராளமானோர் புனித நீராடி, தங்களது முன்னோர்களுக்கு திதி மற்றும் தர்ப்பணம் செய்து வருகின்றனர். இதே போன்று, திருச்சி ஸ்ரீரங்கம் அம்மா மண்டபம், வேதாரண்யம், ஈரோடு கொடுமுடி, பவானி கூடுதுறை ஆகிய இடங்களிலும், கோயில்களிலும் பொதுமக்கள் தங்கள் முன்னோர்களுக்கு தர்ப்பணம் அளித்தனர். நாகை மாவட்டம் பூம்புகாரில், காவிரி கடலோடு கலக்குமிடமான சங்கமத் துறையில் ஆயிரக்கணக்கானோர் தங்களது முதாதையர் நினைவாக தர்பணம் செய்து காவிரி மற்றும் கடலில் புனித நீராடி வழிபட்டனர்.
பிதுர் வழிபாட்டுக்குரியநாள் மகாளய அமாவாசை. பிதுர்லோகத்தில் இருந்து நம் முன்னோர் ஆண்டு தோறும் புரட்டாசி மகாளய பட்சத்தில் பூலோகம் வந்து பதினைந்து நாட்கள் தங்கியிருப்பதாகவும், மகாளய அமாவாசையன்று மீண்டும் பிதுர்லோகம் புறப்படுவதாகவும் ஐதீகம். இந்நாளில் தீர்த்த ஸ்நானம் செய்வது, தர்ப்பணம் கொடுப்பது, பசுவுக்கு கீரை கொடுப்பது, காகத்திற்கு உணவளிப்பதன் மூலம் பிதுர்களின் ஆசி நமக்கு கிடைக்கும்.
