களைகட்டுகிறது தேர்த்திருவிழா; பூத வாகனத்தில் சோமாஸ்கந்தர் சந்திர பிரபையுடன் வீரராகவர்
திருப்பூர்; திருப்பூர் ஸ்ரீவிஸ்வேஸ்வர சுவாமி மற்றும் ஸ்ரீவீரராகவப்பெருமாள் கோவில் வைகாசி விசாகத் தேர்த்திருவிழா, பக்திப் பரவசத்துடன் களைகட்டி வருகிறது. திருவிழா இரண்டாம் நாளான நேற்று காலை 10:00 மணியளவில், விஸ்வேஸ்வர சுவாமி கோவிலில் வீற்றிருக்கும் விநாயகர், சோமாஸ்கந்தர், சூலதேவர் மற்றும் விசாலாட்சி அம்மனுக்குச் சிறப்பு அபிஷேகங்களும் மகாதீபாராதனைகளும் விமரிசையாக நடைபெற்றன.
மாலையில் யாகசாலையில் சிவாச்சாரியார்கள் வேதமந்திரங்கள் முழங்கச் சிறப்பு யாகபூஜைகளைச் செய்து தீபாராதனை காட்டினர். மாலை 6:30 மணியளவில் கண்கவர் அலங்காரத்தில் சோமாஸ்கந்தர் பூத வாகனத்திலும், விசாலாட்சி அம்மன் அன்ன வாகனத்திலும் எழுந்தருளி, மங்கள வாத்தியங்கள் முழங்கத் திருவீதியுலா வந்து பக்தர்களுக்குக் காட்சியளித்தனர். ஸ்ரீவீரராகவப்பெருமாள் கோவிலில் நேற்று காலை சூரியபிரபை வாகன காட்சியும், மாலையில் சந்திரபிரபை வாகன காட்சியும் பக்தி சிரத்தையுடன் நடைபெற்றன. ஸ்ரீதேவி, பூதேவி சமேத வீரராகவப்பெருமாள் சிறப்பு அலங்காரத்தில் எழுந்தருளி வீதி உலா வந்து பக்தர்களுக்கு அருள்பாலித்தனர். இரவில் பெருமாள் கோவில் மேடையில் திருப்பூர் ஸ்ரீவாரி டிரஸ்ட், மாவட்ட தேவர் பேரவை மற்றும் அகில பாரத ஐயப்ப சேவா சங்கம் சார்பில், வீரமணி ராஜூ மற்றும் அபிஷேக் ராஜூ குழுவினரின் பக்திப் பாடல் இன்னிசை நிகழ்ச்சி அரங்கேறியது. திரளான பக்தர்கள் திரண்டு வந்து இசை மழையிலும், சுவாமி தரிசனத்திலும் திளைத்தனர். முக்கிய நிகழ்வாக, வரும் மே 28-ம் தேதி இரவு பஞ்சமூர்த்திகள் 63 நாயன்மார்களுக்கு அருட்காட்சி அளிக்கும் புறப்பாடும், 29-ம் தேதி திருக்கல்யாண உற்சவமும் நடைபெற உள்ளன. வரும் 30-ம் தேதி விநாயகர், விஸ்வேஸ்வரர் தேரோட்டமும், 31-ம் தேதி வீரராகவப்பெருமாள் தேரோட்டமும் வெகுவிமரிசையாக நடைபெற உள்ளதால் ஒட்டுமொத்த திருப்பூரும் ஆன்மிகக் கோலாகலத்தில் மூழ்கியுள்ளது.
