திருவெற்றியூர் பாகம்பிரியாள் கோயிலில் சித்திரை தேரோட்டம்
திருவாடானை; திருவாடானை அருகே திருவெற்றியூரில் சிவகங்கை தேவஸ்தானத்திற்கு சொந்தமான பாகம்பிரியாள் கோயில் சித்திரை திருவிழா மே 1ல் கொடியேற்றத்துடன் துவங்கியது. இன்று காலை 8:45 மணிக்கு தேரோட்டம் நடந்தது. வல்மீகநாதர் பிரியாவிடையுடன் அமர்ந்த தேரும், பாகம்பிரியாள் அம்மன் தேரையும் பக்தர்கள் வடம் பிடித்து இழுத்தனர். முன்னதாக மணிகண்டன் குருக்கள், வல்மீகநாத குருக்கள் தலைமையில் வேத மந்திரங்கள் முழங்க தீபாராதனை நடந்தது. காலை 10:00 மணிக்கு தேர்கள் கோயில் முன்பு நிறுத்தப்பட்டது. மீண்டும் தேர்கள் இழுக்கப்பட்டு மாலை 6:00 மணிக்கு நிலைக்கு செல்லும். தேவஸ்தான செயல் அலுவலர் செந்தில்குமார், கவுரவ கண்காணிப்பாளர் சுந்தர்ராஜன் மற்றும் திருவெற்றியூர் கிராமத்தினர் கலந்து கொண்டனர். வெளி மாவட்டங்களை சேர்ந்த ஏராளமான பெண் பக்தர்கள் வடம் பிடித்தனர்.
