ஒரு வழிப்பாதை அமல் : சபரிமலை பக்தர்கள் செல்ல வேண்டிய பாதை எது?
டிசம்பர் 19,2024
கம்பம்; சபரிமலைக்கு செல்லும் பக்தர்கள் கம்பமெட்டு சென்றபின் சபரிமலை செல்ல பல பாதைகள் உள்ளன. எந்தெந்த பாதைகள் வழியாக செல்லலாம் என்று கேரள அதிகாரிகள் கூறியதாவது :
ஒவ்வொரு ஆண்டும் கார்த்திகை மாதம் முதல் தேதி துளசி மாலை அணிந்து விரதம் இருந்து சபரிமலைக்கு பக்தர்கள் செல்வது வழக்கம். தமிழகம் மட்டுமல்லாது கர்நாடகா, ஆந்திரா, தெலுங்கானா, புதுச்சேரி உள்ளிட்ட இந்தியா முழுவதும் இருந்து பக்தர்கள் செல்வார்கள். கார்த்திகை, மார்கழி, தை மாதம் என 3 மாதங்களுக்கு லட்சக்கணக்கில் பக்தர்கள் சென்று வருகின்றனர். சபரிமலைக்கு செல்ல நாகர்கோயில், செங்கோட்டை, பொள்ளாச்சி என பல வழிகள் இருந்தாலும், பெரும்பாலான பக்தர்கள் தேனி, கம்பம், குமுளி வழியாக செல்வது வழக்கம். குமுளி மலைப்பாதையில் போக்குவரத்து நெரிசல் ஏற்படுவதால், கடந்த பல ஆண்டுகளுக்கு முன்பே ஒருவழிப்பாதை திட்டம் அமுல்படுத்தப்பட்டது. அதன்படி கோயிலிற்கு செல்லும் வாகனங்கள் கம்பத்திலிருந்து திருப்பிவிடப்பட்டு கம்பமெட்டு, சேத்து குழி, ஆமையாறு, புளியன் மலை, கட்டப்பனை, ஏலப்பாறை, குட்டிக்கானம், எருமேலி வழியாக கோயிலிற்கு சென்று வந்தனர்.
இந்தாண்டு நேற்று முன்தினம் முதல் தேனி மாவட்ட நிர்வாகம் கம்பமெட்டு ரோட்டில் ஒருவழிப்பாதையாக அறிவித்துள்ளது. பக்தர்களின் வாகனங்களும் திருப்பி விடப்படுகிறது. கம்பமெட்டு ரோட்டில் செல்லும் பக்தர்களின் வாகனங்கள் கம்பமெட்டை தாண்டியபின், பல பாதைகள் இருப்பதால், எந்த பாதையில் செல்வது என தெரியாமல் குழம்புகின்றனர். இது தொடர்பாக கேரள போலீஸ் அதிகாரிகளிடம் கேட்டதற்கு அவர்கள் கூறியதாவது: கம்பமெட்டிலிருந்து அந்நியார் தொழு வழியாக புளியன் மலை சென்று , பின் கட்டப்பனை, ஏலப்பாறை, குட்டிக்கானம் எருமேலி செல்லலாம். ஆனால் அந்நியார் தொழு ரோட்டில், பல ரோடுகள் பல இடங்களில் பிரியும். எனவே அந்த ரோட்டை தவிர்த்து விடுவது நல்லது. கம்பமெட்டு, சேத்துகுழி, ஆமையாறு, புளியன் மலை கட்டப்பனை, ஏலப்பாறை வழியாக செல்வது நல்லது. அல்லது கம்பமெட்டு, சேத்துகுழி, ஆமையாறு, புத்தடி, செல்லிமடை பின் குமுளி சென்று வழக்கம்போல வண்டிப் பெரியாறு, பீர்மேடு, குட்டிக்கானம், எருமேலி செல்லலாம்" இவ்வாறு கூறியுள்ளனர். கம்பமெட்டு ரோட்டில் செல்லும் சபரிமலை செல்லும் பக்தர்களுக்கு, கம்பமெட்டில் இருந்து எவ்வாறு செல்ல வேண்டும் என்பதை விளக்கும் பாதை வரைபடம் பிரிண்ட் செய்து, துண்டு பிரசுரங்களை விநியோகம் செய்வது கட்டாயம். இந்த விஷயத்தில் கலெக்டர் கவனம் செலுத்தி நடவடிக்கை எடுக்க வேண்டும்.
