மேல்மலையனுாரில் ஊஞ்சல் உற்சவம்; லட்சக்கணக்கானக்கில் குவிந்த பக்தர்கள்
செஞ்சி; மேல்மலையனுார் அங்காளம்மன் கோவிலில் தை அமாவாசை ஊஞ்சல் உற்சவத்தில் லட்சக்கணக்கான பக்தர்கள் சாமி தரிசனம் செய்தனர்.
விழுப்புரம் மாவட்டம் மேல்மலையனுார் அங்காளம்மன் கோவிலில் நேற்று தை மாத அமாவாசை ஊஞ்சல் உற்சவம் நடந்தது. இதை முன்னிட்டு அன்று காலை அம்மனுக்கு சிறப்பு அபிஷேகமும், தங்க காப்பு அலங்காரமும் செய்தனர். இரவு 11.30 மணிக்கு ராஜராஜேஸ்வரி அலங்காரத்தில் சிறப்பு அலங்காரத்தில் அம்மன் ஊஞ்சல் மண்டபத்தில் எழுந்தருளினார். அங்கு கோவில் பூசாரிகள் தாலாட்டு பாடல் பாடி ஊஞ்சல் உற்சவம் நடத்தினர். இதில் லட்சக்கானக்கான பக்தர்கள் கலந்து கொண்டு கற்பூர தீபம் ஏற்றி அம்மனை வழிபட்டனர். விழா ஏற்பாடுகளை ஹிந்து சமய அறநிலையத்துறை உதவி ஆணையர் ஜீவானந்தம், அறங்காவலர் குழு தலைவர் மதியழகன் மற்றும் அறங்காவலர்கள் செய்திருந்தனர். விழுப்புரம் கலெக்டர் பழனி, எஸ்.பி., சரவணன் ஆகியோர் கலந்து கொண்டனர். ஏ.டி.எஸ்.பி., திருமால் தலைமையில் 500க்கும் மேற்பட்ட போலீசார் பாதுகாப்பு பணியில் ஈடுபட்டனர். தை அமாவாசை என்பதால் காலை முதல் இரவு வரை லட்சக்கணக்கான பக்தர்கள் சாமி தரிசனம் செய்தனர்.
தாமதம்; ஒவ்வொரு அமாவாசையின் போதும் பக்தர்ககளிடம் நகை, மொபைல் போன், மணி பர்ஸ் ஆகியன திருடு போகின்றது. இதை கட்டுப்படுத்த போலீசார் இந்த மாதம் சில மாற்றங்கள் செய்திருந்தனர். இதன் ஒரு பகுதியாக கோவில் முதல் சுற்று பிரகாரத்தில் உற்சவர் அம்மனை பக்தர்கள் சாமி தரிசனம் செய்யும் இடத்தில், காவலுக்கு போலீசார் நிறுத்தப்பட்டனர். இவர்கள் பக்தர்கள் குவிந்து நிற்காமல் உடனுக்குடன் அங்கிருந்து அனுப்பினர். இதனால் பக்தர்களுக்கு குங்குமம், சாமி கயிறு வழங்க முடியவில்லை எனக் கூறி பூசாரிகள் அம்மனை உஞ்சல் மண்டபத்திற்கு கொண்டு செல்ல மாட்டோம் என பிரச்சனை எழுப்பினர். இதையடுத்து உதவி ஆணையர் ஜீவானந்தம் இரு தரப்பிலும் பேச்சு வார்த்தை நடத்தி சமாதானம் செய்தார். இதையடுத்து வழக்கமாக 11 மணிக்கு ஊஞ்சல் மண்டத்திற்கு கொண்டு வரும் அம்மனை, அரை மணி நேரம் தாமதமாக 11.30 மணிக்கு கொண்டு வந்தனர்.
