திருப்பதியில் கல்பவிருட்ச வாகனத்தில் ராஜகோபாலன் அலங்காரத்தில் மலையப்ப சுவாமி உலா
திருப்பதி; திருமலை திருப்பதியில் நடைபெற்று வரும் வருடாந்திர பிரம்மோற்சவத்தின் நான்காம் நாளான இன்று வெள்ளிக்கிழமை காலை, ஸ்ரீதேவி மற்றும் பூதேவி ஆகிய தேவியருடன் கோவுல கோபன்னா ராஜகோபாலன் திருக்கோலத்தில் கல்பவிருட்ச வாகனத்தில் எழுந்தருளிய மலையப்ப சுவாமி பக்தர்களுக்கு அருள்பாலித்தார். திருமாட வீதிகளில் நடைபெற்ற இந்தச் சிறப்பான வாகன சேவையின்போது, திரளான பக்தர்கள் சுவாமியை தரிசித்து பக்திப் பரவசத்தில் ஆழ்ந்தனர். *
கல்பவிருட்ச வாகனம் வேண்டுதல்களை நிறைவேற்றும் தெய்வீக வாகனம். பாற்கடல் கடையப்பட்டபோது தோன்றிய தெய்வீகப் பொருட்களில் கல்பவிருட்சமும் ஒன்றாகும். வேண்டிய வரங்களை அருளும் தன்மையைக் குறிக்கும் இந்த வாகனத்தில் எழுந்தருளிய ஸ்ரீனிவாசப் பெருமான், பக்தர்களின் அனைத்து விருப்பங்களையும் நிறைவேற்றும் வகையில் தெய்வீகத் திருக்கோலத்தில் காட்சியளித்தார். இந்த வாகன சேவையில் திருமலை பெரியஜீயர் சுவாமி, சின்ன ஜீயர் சுவாமி, தேவஸ்தான நிர்வாக அதிகாரி முத்தாடா ரவிச்சந்திரா, பல வாரிய உறுப்பினர்கள், கூடுதல் நிர்வாக அதிகாரி வெங்கய்ய சௌத்ரி, சிவிஎஸ்ஓ முரளி கிருஷ்ணா மற்றும் பலர் கலந்துகொண்டனர்.
