சார்தாம் யாத்திரை: 60 லட்சத்திற்கும் மேற்பட்ட பக்தர்கள் தரிசனம்: நவ., 16ல் பத்ரிநாத் கோவில் நடை அடைப்பு
உத்தரகண்ட்: இமயமலையில் அமைந்துள்ள புகழ்பெற்ற சார்தாம் புனிதத் தலங்களுக்கு இந்த ஆண்டில் இதுவரை 60 லட்சத்துக்கும் அதிகமான பக்தர்கள் யாத்திரை மேற்கொண்டுள்ளனர். கடந்த செவ்வாய்க்கிழமை மாலை நிலவரப்படி, மொத்தம் 60,31,017 பேர் தரிசனம் செய்துள்ளதாக அதிகாரிகள் தெரிவித்துள்ளனர்.
இந்த ஆண்டுக்கான சார்தாம் யாத்திரை ஏப்ரல் 19ம் தேதி தொடங்கியது. தற்போது இறுதிக்கட்டத்தை எட்டியுள்ள நிலையில், நவம்பர் 16-ம் தேதி பத்ரிநாத் கோவில் நடை மூடப்பட்டதும் யாத்திரை குளிர்காலத்துக்காக நிறைவடையும். இந்தப் பருவத்தில் அதிக பக்தர்கள் தரிசனம் செய்த தலமாக பத்ரிநாத் கோவில் முதலிடத்தில் உள்ளது. அங்கு இதுவரை 20,69,866 பேர் தரிசனம் செய்துள்ளனர். கேதார்நாத் கோவிலில் 17,75,059 பேர் தரிசனம் செய்துள்ளனர். கடந்த ஆண்டு சார்தாம் தலங்களுக்கு 50 லட்சத்துக்கும் அதிகமான பக்தர்கள் வந்திருந்தனர். 2023-ம் ஆண்டில் 56 லட்சத்துக்கும் அதிகமானோர் யாத்திரை மேற்கொண்டனர். இந்த ஆண்டு பக்தர்கள் வருகை 60 லட்சத்தைக் கடந்துள்ளது குறிப்பிடத்தக்கது.
உத்தரகாசி மாவட்ட ஆட்சியர் பிரசாந்த் ஆர்யா கூறுகையில், குளிர்கால சார்தாம் யாத்திரைக்கான ஏற்பாடுகளில் நிர்வாகம் கவனம் செலுத்தி வருவதாகத் தெரிவித்தார். குளிர்காலத்தில் கங்கா தேவியின் உற்சவர் மூர்த்தி முக்பா பகுதிக்கும், யமுனை தேவியின் உற்சவர் மூர்த்தி கர்சாலி பகுதிக்கும் கொண்டு செல்லப்படுவார்கள். அங்கு பக்தர்கள் தொடர்ந்து தரிசனம் செய்ய ஏற்பாடுகள் மேற்கொள்ளப்படும் என்றும் அவர் கூறினார். யாத்திரைக் காலம் முழுவதும் பக்தர்களின் வசதிக்காகவும், சீரான ஏற்பாடுகளை உறுதி செய்யவும் சம்பந்தப்பட்ட துறைகளுக்கு அறிவுறுத்தப்பட்டுள்ளதாகவும் அவர் தெரிவித்தார்.
கேதார்நாத் தரிசனம்: கேதார்நாத் கோவில் நடை மூடப்பட்ட பிறகு, அங்குள்ள இறைவனின் உற்சவர் மூர்த்தி உத்தரகண்ட் மாநிலத்தின் உகிமத் பகுதிக்கு எடுத்துச் செல்லப்படும். அங்கிருந்து குளிர்கால யாத்திரை தொடங்கும். கேதார்நாத் பண்டிதர்கள் சங்கத் தலைவர் ராஜ்குமார் திவாரி கூறுகையில், கடந்த ஆண்டு உகிமத் பகுதிக்கு ஏராளமான சுற்றுலாப் பயணிகள் வந்ததாகத் தெரிவித்தார். குளிர்கால இருப்பிடத்துக்கு இறைவன் எழுந்தருளிய பிறகு, அங்குப் பக்தர்கள் தொடர்ந்து தரிசனம் செய்யலாம் என்றும், திரியுகி நாராயண் கோவில் உள்ளிட்ட அருகிலுள்ள புனிதத் தலங்களுக்கும் செல்லலாம் என்றும் கூறினார். குளிர்காலத்திலும் இமயமலைப் புனிதத் தலங்களில் தரிசன வாய்ப்பு தொடரும் என்பதால், பக்தர்களுக்கான ஏற்பாடுகளை உத்தரகண்ட் நிர்வாகம் தீவிரப்படுத்தியுள்ளது.
