ராசிபுரம்: ராசிபுரத்தில், 50 ஆண்டு பழமையான சர்ச் சீரமைக்கும் பணி தொடங்கியது. ராசிபுரம், புது பஸ் ஸ்டாண்ட் அருகே, சேலம் பிரதான சாலையில் தூய லூர்து அன்னை ஆலயம் உள்ளது. இந்த சர்ச் கட்டி முடிக்கப்பட்டு, அடுத்த ஆண்டுடன், 50 ஆண்டுகள் நிறைவு பெறுகிறது.

இதையடுத்து, 2020 பிப்ரவரி, 11ம் தேதி முதல், 2021 பிப்ரவரி, 2ம் தேதி வரை ஓராண்டு முழுவதும் பொன்விழா ஆண்டாக கொண்டாட ஏற்பாடு செய்துள்ளனர். இந்நிலையில் தற்போது, சர்ச் புனரமைக்கும் பணி தொடங்கியுள்ளது. வர்ணம் பூசுவது, சேதமடைந்த பகுதிகளை நீக்கிவிட்டு புதியதாக கட்டமைப்பது உள்ளிட்ட பணிகள் நடக்கின்றன. இந்நிலையில் சர்ச்சின் மேல், 30 அடி உயரத்தில் இருந்த சிலுவை மற்றும் அலங்கார வளைவுகளை அகற்றும் பணி நடந்தது. 50 அடி உயர கிரேன் மூலம் அலங்கார வளைவுகள் நேற்று 29ம் தேதி அகற்றப்பட்டன. இதனால், இப்பகுதியில் சிறிது நேரம் போக்குவரத்து பாதிக்கப்பட்டது.