கோவை : கோவை ராம்நகர் சத்தியமூர்த்தி சாலையிலுள்ள, ஸ்ரீ ஐயப்பன் பூஜா சங்கத்தின் 70வது மஹோற்சவ விழா நேற்று துவங்கியது.

அதிகாலை 4:30 மணிக்கு, பேரூர் விஸ்வநாத கனபாடிகள், சுந்தரவாத்தியார் ஆகியோரது தலைமையில், மஹாகணபதி ஆவாஹனம் செய்து கணபதி ஹோமம் நடந்தது.தொடர்ந்து தர்மசாஸ்தா, ஸ்ரீஅம்பாள் ஆவாஹனம் செய்து சூர்யநமஸ்காரம் அபிஷேகம் நடந்தது. காலை 7:30 மணிக்கு மகாருத்ர ஜபம் நவக்கிரஹஹோமம், ஸ்ரீசுதர்சனஹோமம் ஆகியவை நடந்தது. 12:30 மணிக்கு மகாபூர்ணாஹூதி, வசோர்தாரை மகாதீபாராதனை நடந்தது. வழக்கமாக நடைபெறும் பக்தபோஜனம் என்றழைக்கப்படும் மகாஅன்னதானம், கொரோனா வைரஸ் பரவல் காரணமாக, உணவு பொட்டலங்களாக, ஆதரவற்றோர் இல்லங்கள், தொலை துார கிராமங்களில் வசிக்கும் ஏழை எளிய மக்களுக்கு, வாகனங்களில் சென்று வினியோகிக்கப்பட்டது.உலக ஷேமத்திற்காக ஆண்டுதோறும் நடத்தப்படும் மகாருத்ரம், இந்த ஆண்டு, 121 வேதவிற்பன்னர்களை கொண்டு, 11 அடுக்குகளாக பிரித்து நான்கு நாட்களுக்கு நடத்தப்படுகிறது.இந்த மகாருத்ர ஜபம், அன்றாடம் காலை 7:30 மணிக்கு துவங்கி நடைபெறும்.வரும் சனியன்று மகாருத்ரஜபம் நிறைவடைந்து, அன்று காலை 8:00 மணிக்கு மகாருத்ர ஹோமம் நடக்கிறது. தொடர்ந்து ஐயப்பசுவாமிக்கு லட்சார்ச்சனையும், அஷ்டாபிஷேகமும் நடைபெறும்.

ஞாயிறன்று காலை 9:00 மணிக்கு பஞ்சவாத்தியங்கள் முழங்க திருவாபரண பெட்டியுடன் திருமஞ்சனஉலாவும், 11:00 மணிக்கு ஐயப்பசுவாமிக்கு புஷ்பாஞ்சலி, கனகாபிஷேகம், கோவை ஜெய்ஹிந்த் முரளி பாகவதர் குழுவினரின் திவ்யநாம பஜனையும் நடக்கிறது.மதியம் 1:00 மணிக்கு மகாதீபாரதனையோடு, விழா நிறைவடைகிறது. ஏற்பாடுகளை ஸ்ரீ ஐயப்பன் பூஜா சங்க நிர்வாகிகள் செய்து வருகின்றனர்.பக்தர்களுக்கு வேண்டுகோள்தற்போது நிலவி வரும் கோவிட் 19 சூழல் காரணமாக,அரசு உத்தரவுப்படி, ஸ்ரீ ஐயப்பன்பூஜா சங்க ஆண்டுவிழா பூஜைகளில் உறுப்பினர்கள் மற்றும் கட்டளைதாரர்கள் மட்டும் பங்கேற்கலாம். பக்தர்கள், facebook:sri ayyappan puja sangham,web:www.savithrilive.com, youtube:bakthinaama என்ற லிங்க்கில் தொடர்பு கொண்டு, காணொளி பூஜா நிகழ்ச்சிகளை தரிசனம் செய்ய, ஸ்ரீ ஐயப்பன் பூஜா சங்கம் ஏற்பாடு செய்துள்ளது.