குளித்தலை: குளித்தலை அடுத்த, தோகைமலை பகவதியம்மன், கருப்பசாமி, வெள்ளப்பட்டி மாரியம்மன் கோவில் திருவிழா, 15 ஆண்டுகளுக்கு பின், எட்டு கிராம மக்களின் சார்பில் நடக்கிறது. இதில், தோகைமலை, திருமாணிக்கம்பட்டி, வருந்திபட்டி, பழனிகவுண்டன்பட்டி, கல்லுப்பட்டி, பச்சனாம்பட்டி, வெள்ளபட்டி, நாக்காகுளம், குறிஞ்சிநகர், தெற்குபள்ளம் உள்பட கிராம மக்கள் பங்கேற்றனர். நேற்று முன்தினம், பகவதியம்மனுக்கு சந்தைபேட்டையில் இருந்து கரகம் பாலித்து, முத்துபல்லாக்கில் வாணவேடிக்கையுடன் திருவீதி உலா நடந்தது. அன்று மாலை, பொங்கல், மாவிளக்கு, கிடாவெட்டுதல் போன்ற நிகழ்ச்சிகள் நடந்தன. நேற்று, பகவதியம்மன் கோவிலில் இருந்து பூ பல்லாக்கில் வெள்ளப்பட்டி மாரியம்மன் சன்னதிக்கு வழியனுப்பு நிகழ்ச்சி நடந்தது. தொடர்ந்து, மஞ்சள் நீராட்டு, கரகம் கலைத்தல் நிகழ்ச்சியுடன் திருவிழா நிறைவடைந்தது.