காரிமங்கலம்: தர்மபுரி மாவட்டம், காரிமங்கலம் அடுத்த சொட்டாண்டஹள்ளியில், முனியப்ப சுவாமி கோவில் கும்பாபிஷேக விழா நடந்தது. தர்மபுரி மாவட்டம், காரிமங்கலம் அடுத்த சொட்டாண்டஹள்ளி கிராமத்தில், ஏழு முனியப்ப சுவாமி கோவில்  அமைக்கப்பட்டுள்ளது. இதன் கும்பாபிஷேக விழா, கடந்த, 25ம் தேதி கொடியேற்றத்துடன் துவங்கியது. 27ல், புற்றுமண் எடுத்தல், முளைப்பாரி எடுத்தல், முதல் கால யாகபூஜை, மருந்து சாத்துதல் போன்றவை நடந்தது. நேற்று முன்தினம், காலை, 4:30 மணிக்கு,  விக்னேஸ்வர பூஜை, புண்யாக வாசனம், இரண்டாம் கால யாகபூஜை நடந்தது. 6:00 மணிக்கு, பச்சியம்மன், முனீஸ்வர சுவாமிக்கு மஹா கும்பாபிஷேகம் நடந்தது. தொடர்ந்து, காலை, 9:00 மணிக்கு மேல் பக்தர்களுக்கு அன்னதானம் வழங்கப்பட்டது. இன்று முதல்,  அடுத்த, 48 நாட்களுக்கு மண்டல பூஜை நடக்கிறது. விழா ஏற்பாடுகளை, விழாக்குழுவினர் செய்து வருகின்றனர்.