ஆண்டாளின் பாசுரங்களில் நேர்த்தி, ஒழுங்கு என கட்டுக்குலையாத கட்டமைப்பு காணப்படுகிறது. உதாரணத்திற்கு மாலே மணிவண்ணா எனத் தொடங்கும் பாசுரத்தை எடுத்துக் கொள்வோம். இதில்  ஆண்டாள் சொல்கிறாள், “கண்ணா…நோன்பு இருக்கும் போது உன்னை வழிபட எங்களுக்கு ஆறு விஷயங்கள் தேவை. சங்கு, பறை, பல்லாண்டு இசைப்பவர்கள், கோலவிளக்கு, கொடி, விதானம்.  இந்த ஆறையும் எங்களுக்கு அருள்வாய் கண்ணா!” என்கிறாள். எப்படி அவள் இந்த வரிசையை தேர்ந்தெடுத்தாள்? கோயிலை விட்டு மிகத் தொலைவில் நீங்கள் இருக்கிறீர்கள் என வைத்துக் கொள்வோம். கோயிலில் நடக்கும் விசேஷத்தின் போது முதலில் நமக்கு கேட்பது இந்த சங்கின் ஒலி தான். கோயிலை விட்டு நாம் நெடுந்துாரம் இருந்தாலும் இந்த சங்கின் ஒலி தான் நம்மை முதலில் வந்தடையும். அது பேரொலி அல்லவா? சரி நாம் இன்னும் கொஞ்சம் கோயிலை நெருங்கிச் செல்கிறோம் என்றால் பறையோசை நமக்கு கேட்கும். அதையும் தாண்டி இன்னமும் நெருங்கும் போது பல்லாண்டு இசைப்பவர்களின் இனிய இசை கேட்கும். அதையும் கடந்து நாம் உள்ளே செல்லும்போது கோயிலின் உள்ளே இருக்கும் விளக்கை பார்க்க முடியும். விளக்குக்கு அடுத்தபடியாக கொடி இருக்கும். அது கருடனின் கொடி. அதற்கு அடுத்தபடியாக விதானம் இருக்கும். இங்கு விதானம் என்பது எம்பெருமானின் தலையில் கட்டும் மேற்கட்டு என்ற ஆடையை குறிக்கும்.  ஆக கேட்கப்படும் அந்த 6 பொருள்களையும் சீரான வரிசையில் கேட்கிறாள்.

ஒரு கோயில் இருக்கக்கூடிய தெருவில் நடந்து போனோமானால் என்னென்ன விஷயங்களை முதலில் உள்வாங்குவோமோ அதை அப்படியே தன் பாசுரங்களில் அழகாக பதிவேற்றி உள்ளாள் ஆண்டாள். சம்பவங்களின் கட்டமைப்பு அவ்வளவு நேர்த்தியாக அமைந்துள்ளது. இதுமட்டுமல்ல, பொருட்களின் கட்டமைப்பு கூட அப்படி இருக்கிறது. கூடாரை வெல்லும் சீர் கோவிந்தா என்னும் நோன்பு நிறைவு பாசுரத்தில், “ஏ கோவிந்தா… நீயும் நாங்களும் கூடியிருந்து உள்ளம் குளிர்ந்து நாட்டில் உள்ளவர்கள் புகழும்படியாக கையில் வளையல்களையும்,  தோளில் அணியும் தோல்வளையாகிய வங்கியையும், காதில் அணியும் தோடும், காதின் மேல் பகுதியில் அணியும் செவிப்பூ என்ற கொப்பும், காலில் அணியும் பாடகம் என்ற தண்டையும், அதற்கு அடுத்து புத்தாடையும் அணிந்து கொள்வோம். பால் சோற்றை நெய் மூடுமாறு விட்டு, கையில் வாங்கினால் முழங்கையில் நெய் வழிந்தோடுமாறு உண்ணுவோம் என வரிசைப்படுத்துகிறாள். குளித்து முடித்து, அலங்கரித்துக் கொண்டு, புத்தாடை அணிந்து பின் உணவருந்தும் முறை சீராக இருக்கிறது. அன்றாட நிகழ்வுகளையும், இயற்கையையும், வாழ்வியல் பழக்க வழக்கங்களையும் எவ்வளவு அழகாக கவனித்து அதை உள்வாங்கி, மேலும் இலக்கண மரபுப்படி செதுக்கியிருக்கிறாள் என பார்க்கும்போது நமக்கெல்லாம் ஆச்சரியத்துடன் ஆனந்தமும் பெருக்கெடுக்கிறது.