நீலகிரி மாவட்டத்தில் முதன்முதலில் தோன்றிய முருகன் கோயில். மலையும் மலை சார்ந்த இடத்தில் குறிஞ்சி கடவுள் முருகனை வழிபடுதல் என்பது இத்தலத்துக்கு கூடுதல் சிறப்பு. முருகன் உள்ள தலத்தில் பெருமாள் எழுந்தருளியிருப்பது விஷேசம். 7500 அடி உயரத்தில் இருக்கும் முருகன் கோயில் இது.

பொதுவாக கோயில்களில் பன்னிரண்டு ஆண்டுகளுக்கு ஒரு முறை கும்பாபிஷேகம் நடைபெறுவது மரபு. ஆனால் பல்வேறு காரணங்களினால் இங்கு நாற்பது ஆண்டுகளாக கும்பாபிஷேகம் நடைபெறவில்லை. இந்நிலையில் பக்தர்களின் தீவிர முயற்சியினால் கோயில் திருப்பணிகள் தொடங்கப்பட்டு வெகு விமர்சியாக கும்பாபிஷேகம் நடைபெற்றது.

குன்றின்மீதுள்ள கோயிலே அடைய, முன்பு சரிவான மேட்டுச் சாலையில் ஏறிச் செல்ல வேண்டும். முருகனை படியேறிச் சென்று தரிசிப்பது சிறப்பன்றோ! அதனால் தற்போது 108 படிகளுடன் 5 மண்டபங்களையும் அமைத்துள்ளனர்.

நாராயண தீர்த்தத்திலிருந்து எடுக்கப்படும் நீர்தான் முருகனின் அபிஷேகத்திற்குப் பயன்படுத்தப்படுகிறது.

அக்காலத்தில் இப்பகுதியில் இணைபிரியாத நண்பர்களாக வாழ்ந்து வந்தனர் இருவர். பழநி முருகப்பெருமான் மீது ஆழ்ந்த பக்தியும் ஈடுபாடும் கொண்ட அவர்கள் ஒவ்வொரு ஆண்டும் தைப்பூசத்திற்கு பழநிக்கு பாதயாத்திரையாகச் சென்று முருகனை தரிசித்து வருவது வழக்கம்.

ஒரு சமயம் உடல்நலக் குறைவால் தைப்பூசத்தன்று அவர்களால் பழநிக்குச் செல்ல முடியவில்லை. இதனால் மிகவும் மனம் வருந்தினர். அன்றிரவு முருகப் பெருமான் அவர்களின் கனவில் தோன்றி அருகிலுள்ள குன்றில் தான் உறைவதாகவும், அங்கேயே கோயில் அமைத்து தன்னை வழிபடுமாறும் கூறினார்.

கனவில் முருகப்பெருமான் குறிப்பிட்ட இடம் எல்க் எனும் ஒருவகை மான்கள் கூட்டம் கூட்டமாக வசித்த குன்றிப் பகுதி, அதனால் எல்க் ஹில்ஸ் எனப் பெயர் பெற்று விளங்கும் இப்பகுதியில் இருவரின் உதவியோடு தற்போதுள்ள கோயில் உருவாகியதாகச் சொல்லப்படுகிறது. இத்தலத்தில் பிரதிஷ்டை செய்யப்பட்டுள்ள முருகனின் திருமேனி பழநி முருகன் சிலையைப் போன்றே உள்ளது. இந்த முருகனின் சிறப்புகளை அறிந்த நிலம்பூர் மகாராஜா, கோயிலுக்குத் தேவையான நிலத்தை தானமாக வழங்கியுள்ளார். நீலகிரி மாவட்டத்தில் அமைந்த முதல் முருகன் கோயில் என்ற பெருமையும் இதற்குண்டு. அங்குள்ள பழங்குடியினரின் குலதெய்வமாகவும் இவர் விளங்குகின்றார்.

படம், தகவல்: வி.பி. ஆலாலசுந்தரம், கோவை.