நாம் ஒவ்வொரு கோயிலாக ஏறும்போது போது மனதில் உள்ள பாரத்தை கடவுளிடம் இறக்கி வைக்கிறோம். அதோடு நம் வேண்டுதல் நிற்கிறதா என்றால்... இல்லை. சாமி.. நீ தான் பொறுப்பு. என் பொண்ணு கல்யாணத்தை நீ தான் நல்லபடியாக நடத்தி வைக்கணும். என் மகனுக்கு நல்ல வேலை வாங்கித்தரணும் என பல விண்ணப்பங்களை வைக்கிறோம். இதெல்லாம் எதைக் காட்டுகிறது. நம்பிக்கையின்மை. ஆம்! கடவுள் மீது முழுமையான நம்பிக்கை இருந்தால் இந்த வேண்டுதல் எதுவும் நம் மனதில் உதிக்காது. சரி. இந்த நம்பிக்கையை யாரிடம் பெறுவது என்ற கேள்வி உங்கள் மனதில் தோன்றலாம். அதற்கு திருவண்ணாமலைக்கு வாருங்கள். அங்கு கிரிவலப்பாதையில் உள்ள திருநேர் அண்ணாமலை கோயிலுக்குள் நுழைந்தால், ‘எல்லாம் அவன் செயல்’ என்ற பூரண நம்பிக்கை தோன்றிவிடும்.

 

பல்லாயிரக்கணக்கான ஆண்டுகளாக உருவாகி, இறுகிப் போயிருக்கும் மலை. காலம் காலமாக வேரும், விழுதுமாகப் படர்ந்த மரங்கள் இருக்கும் மலை. தெய்வீகத் தென்றல் கமழ்ந்தபடி இருக்கும் மலை. பல சித்தர்களின் பாதம் பட்ட மலை. பல நல்ல ஆன்மாக்கள் சுற்றி வரும் மலை என பல்வேறு சிறப்புகளை கொண்டிருக்கும் மலைதான் திருவண்ணாமலை. அந்த மலையின் மகத்துவத்தை சொல்ல இந்த பக்கம் போதாது. வாருங்கள் திருநேர் அண்ணாமலையாரை தரிசனம் செய்வோம்.

குளிர் காற்றும், வெண்பஞ்சு மேகமும் தவழும் மலையின் அடிவாரத்தில் உள்ள கோயில் அது. அடர்ந்த மரங்கள். குரங்குகள் தன் குட்டிகளோடு கொஞ்சி விளையாடும் காட்சி என செழிப்போடு இருக்கும் அந்த இடத்தில் நடுவே எளிமையாக உள்ளார் அண்ணாமலையார். அவரது தரிசனம் நமக்கு நிச்சயம் நலம்தரும். சின்ன சின்ன விளக்குகளின் தீப வெளிச்சங்கள் இடையே, ‘வருத்தப்படாதே... நான் இருக்கிறேன்’ என்று சொல்வார். அந்த நிமிடம் நம் மனதில் உள்ள பாரம் அனைத்தும் இறங்கிவிடும். இவருக்கு எதிரே மலையின் உச்சியை காண முடியும். ஆம்! இவர் மலை உச்சியின் நேராக இருப்பதால் கார்த்திகை தீபத்திற்கும் மூலவருக்கும் ஒரே இடத்தில் தீபாராதனை நடக்கும்.