சிதம்பரம் : நடராஜர் கோவிலில் மார்கழி ஆருத்ரா மகா தரிசனம் உற்சவம் நாளை (1ம் தேதி) கொடியேற்றத்துடன் துவங்குகிறது. 10ம் தேதி நடராஜர் ஆருத்ரா மகா தரிசனம் நடக்கிறது.

சிதம்பரம் நடராஜர் கோவிலில் சிவகாமசுந்தரி அம்மன் சமேத ஆனந்த நடராஜருக்கு மார்கழி ஆருத்ரா மகா தரிசன உற்சவம் 10ம் தேதி நடக்கிறது. இதனையொட்டி நேற்று (டிசம்., 30ல்) மாலை துவாஜாரோஹனம் கொடி மரத்திற்கு விக்னேஸ்வர பூஜை, பல்வேறு சிறப்பு ஹோம பூஜைகள் நடந்தது.புத்தாண்டான நாளை காலை சிவகாமசுந்தரி அம்மன் சமேத ஆனந்த நடராஜருக்கு சிறப்பு அபிேஷகம், அலங்காரம், மகா தீபாராதனை நடக்கிறது. பஞ்சமூர்த்திகள் புறப்பாடு செய்து, பிரகாரம் வலம் வந்து சன்னதி கொடிமரம் முன்பு எழுந்தருளி பக்தர்களுக்கு காட்சியளிப்பார்.

கொடி மரத்திற்கு உற்சவ ஆச்சாரியார் சிறப்பு பூஜை செய்து, பன்னிரு திருமுறை வழிபாடு நடைபெற்று காலை 7 மணிக்கு உற்சவக்கொடி ஏற்றப்பட்டு மகா தீபாராதனை நடக்கிறது. தினம் சிவாகமசுந்தரி அம்மன் சமேத நடராஜருக்கு சிறப்பு அபிஷேகம், அலங்காரம், தீபாரா தனை நடைபெறும். காலை பஞ்சமூர்த்திகள் புறப்பாடும், இரவு சிறப்பு வாகனத்தில் நடராஜர் புறப்பாடு 10 நாட்கள் நடக்கிறது. ஐந்தாம் நாளான 5ம் தேதி, தெருவடைச்சான் (சப்பரம்) தேரோட்டம், 8ம் தேதி இரவு தங்க ரதத்தில் பிச்சாண்டவர் தரிசனம், 9ம் தேதி நடராஜர் திருத்தேரோட்டம், 10ம் தேதி மதியம் 2 மணிக்கு ஆருத்ரா மகா தரிசனம் சித்சபை பிரவேசம் நடக்கிறது.