விருதுநகர்: விருதுநகர் கலெக்டர் அலுவலகம் நான்கு வழிச்சாலை சர்வீஸ் ரோடு அருகில் உள்ள ஸ்ரீபதினெட்டாம்படி கருப்பசாமி கோயிலில் சுவாமியை நினைத்து மனம் உருகி பிரார்த்தனை செய்தால் கேட்ட வரம் தருவார் கருப்பசாமி சுவாமி என பக்தர்களிடையே அசைக்க முடியாத நம்பிக்கை நிலவுகிறது. செவல்பட்டி மற்றும் கூரைக் குண்டு கிராம மக்களுக்கு பாத்தியப்பட்ட இக்கோயில் பழமை வாய்ந்தது.

கோயில் முகப்பின் வலது புறம் அய்யனார் குதிரை வாகனத்திலும், இடது புறம் கருப்பசாமி குதிரை வாகனத்திலும் கம்பீரமாக எழுந்தருள்வது மெய் சிலிர்க்க வைக்கும். இச்சிலைகளை ஸ்தபதி தத்ரூபமாக வடிவமைத்துள்ள பாங்கு அருமை. விநாயகர், பாண்டி முனியாண்டி, அய்யானரப்பன் சுவாமிக்கு தனித்தனி சன்னதிகள் எழுப்பப்பட்டுள்ளன. குடும்பத்தில் மகிழ்ச்சி, செல்வம் பெருக, குழந்தை பாக்கியம், திருமணவரம், வழக்குகள் தீர்வு, தோஷம் நீங்க என கேட்ட வரம் அள்ளித்தரும் கருப்பசாமி சுவாமிக்கு சேவல், ஆட்டுக்கிடாய், அரிவாள் உள்ளிட்டவை களை பக்தர்கள் நேர்த்திக்கடனாக செலுத்தி வருகின்றனர். செவ்வாய், வெள்ளிக்கிழமை கருப்பசாமிக்கு சிறப்பு அலங்காரம், தீபாராதனைகள் நடக்கிறது. அன்று செவல்பட்டி, கூரைக் குண்டு கிராமமக்கள் உட்பட சுற்று வட்டாரங்களில் பக்தர்கள் கூடி வழிபடுகின்றனர்.