சபரிமலை:ச பரிமலையில் ஆன்லைனில் முன்பதிவு செய்த ஐந்தாயிரம் பக்தர்கள் நேற்று முதல் வர தொடங்கினர். பூஜாரிகள் உட்பட ஊழியர்கள் பலருக்கும் கொரோனா உறுதி செய்யப்பட்டதால் தீவிர முன்னெச்சரிக்கை நடவடிக்கைகள் எடுக்கப்பட்டுள்ளன.

கொரோனா கட்டுப்பாடுகள் காரணமாக மண்டல காலத்தில் தினமும் இரண்டாயிரம், சனி, ஞாயிறு தினங்களில் மூவாயிரம் பக்தர்கள் அனுமதிக்கப்பட்டனர். மகரவிளக்கு சீசனில் இது ஐந்தாயிரமாக அதிகரிக்கப்பட்டது. மகரவிளக்கு காலத்தில் நேற்று அதிகாலை 5:00 மணி முதல் பக்தர்கள் தரிசனத்துக்கு அனுமதிக்கப்பட்டனர்.மேல்சாந்தி அறையில் உள்ள உதவி பூஜாரிகள் உட்பட ஊழியர்கள் பலருக்கு கொரோனா உறுதி செய்யப்பட்டதால் தீவிர பாதுகாப்பு நடவடிக்கைகள் எடுக்கப்பட்டுள்ளன.

பெரிய நடைப்பந்தலில் தெர்மல் ஸ்கேனர் பரிசோதனைக்கு பிறகே பக்தர்கள் அனுமதிக்கப் படுகின்றனர். தரிசனம் முடிந்த பின் உடனடியாக பம்பைக்கு திருப்பி அனுப்பப்படுகின்றனர். 48 மணி நேரத்துக்குள் எடுக்கப்பட்ட ஆர்.டி.பி.சி.ஆர்., ஆர்.டி.லேப், எக்ஸ்பிரஸ் நாட் பரிசோதனையின் நெகட்டிவ் சான்றிதழ் இல்லாமல் வருபவர்கள் நிலக்கல்லில் இருந்து திருப்பி அனுப்பப்படுகின்றனர். நிலக்கல்லில் தற்போது கொரோனா பரிசோதனை மையம் இல்லை. படியேற ஒற்றை வரிசை உள்ளது. அமைச்சர் உதயகுமார் தரிசனம் செய்தார். ஜன.14 மகரவிளக்கு விழா நடைபெறுகிறது. 19 வரை தரிசனம் உண்டு.