நயினார்கோவில்: பரமக்குடி அருகே நயினார்கோவில் நாகநாதசுவாமி கோயில் எதிரிலுள்ள வாசுகி தீர்த்தக்குளம் குப்பை கூளமாக இருந்தது குறித்து செப்., 22 ல் தினமலர் நாளிதழில் செய்தி வெளியானது. இதன்படி ஆண்டு முழுவதும் இக்கோயிலுக்கு நேர்த்திக்கடன் செலுத்த வரும் பக்தர்கள் இக்குளத்தில் நீராடி செல்வது வழக்கம். ஆனால் குளம் குப்பைகளால் சூழப்பட்டு கழிவுநீர் கலந்து இருந்தது. மேலும் படிக்கட்டுகள் சேதமடைந்து பக்தர்கள் தடுமாறும் நிலை உள்ளது. இதுகுறித்து தினமலர் நாளிதழ் சுட்டிக்காட்டியது.‌ தொடர்ந்து கடந்த இரண்டு நாட்களாக தேவஸ்தானத்தினர் குளத்தை சுத்தம் செய்யும் பணியில் ஈடுபட்டனர். இந்நிலையில் குப்பைகள் அகற்றப்பட்டு படித்துறைகள் சீர் செய்யப்பட்டன. வரும் நாட்களில் கழிவு நீர் கலப்பதை தடுப்பதுடன், குளத்திற்கு வேலி அமைத்து தகுந்த பாதுகாப்பு செய்தல் வேண்டும் என, பக்தர்கள் கோரிக்கை விடுத்துள்ளனர்.