திருவெண்ணெய்நல்லுார் : திருவெண்ணெய்நல்லுார் அருகே மின்னல் தாக்கி கோவில் கோபுர கலசம் மற்றும் சிலைகள் சேதமாகின.விழுப்புரம் மாவட்டம், திருவெண்ணெய்நல்லுார் பகுதியில் நேற்று முன்தினம் இரவு இடி, மின்னலுடன் பலத்த மழை பெய்தது. அப்போது, பூசாரி பாளையம் கிராமத்தில் உள்ள அங்காளம்மன் கோவில் கோபுரம் மீது மின்னல் தாக்கியது.அதில், கோபுரத்தின் மேல் இருந்த மூன்று கலசங்களில் ஒன்று கீழே விழுந்தது. மேலும், கோபுரத்தில் அமைக்கப்பட்டிருந்த சிலைகள் உடைந்து சேதமாகின. இதனால், அப்பகுதியில் பரபரப்பு நிலவியது.