பெ.நா.பாளையம்: துடியலூர் அருகே உள்ள சின்மயா கிருபாவில் நவராத்திரி விழா இசைக் கச்சேரி நடந்தது.

துடியலூர் அருகே என்.ஜி.ஜி.ஓ., காலனியில் சின்மயா கிருபா என்ற சின்மயா சரஸ்வதி நிலையம் உள்ளது. இங்கு நவராத்திரி விழா கடந்த, 26ம் தேதி முதல் கொண்டாடப்பட்டு வருகிறது. விழாவையொட்டி, தினசரி காலை,10:30 மணி முதல் சகஸ்ரநாம பூஜை, லலிதா, மகாலட்சுமி, சரஸ்வதி பூஜைகள் நடந்து வருகின்றன. மாலை, 5:30 மணி முதல் பூஜா, சத்சங்கம், சிறந்த பெண் சாதனையாளர்களுக்கு சக்தி விருது வழங்கும் நிகழ்ச்சிகளும் நடந்து வருகின்றன. நேற்று கிருஷ்ணா ஸ்வீட்ஸ் இயக்குனர் வைஷ்ணவி கிருஷ்ணனுக்கு சக்தி விருது வழங்கப்பட்டது.

நவராத்திரி விழாவையொட்டி, நேற்று இளம் இசைக் கலைஞர் கீர்த்தனா ராமச்சந்திரனின் வீணை இசைக் கச்சேரி நடந்தது. ராதாகிருஷ்ணன் மிருதங்கம், ஜெகநாதன் மோர்சிங் வாசித்தனர். திரளான இசை ஆர்வலர்கள் கலந்து கொண்டு, வீணை கச்சேரியை ரசித்தனர். நாளை அக்.,4ல் புரூக் பீல்ட் மாலில் மாலை, 6:30 மணி முதல், 8:00 மணி வரை கீர்த்தனா ராமச்சந்திரனின் வீணை இசைக் கச்சேரி நடக்கிறது.