திருப்பரங்குன்றம்: வைகுண்ட ஏகாதசியை முன்னிட்டு திருப்பரங்குன்றம், திருநகர், பாண்டி நகர் கோயில்களில் சொர்க்கவாசல் திறக்கப்பட்டது.

திருப்பரங்குன்றம் சுப்பிரமணிய சுவாமி கோயில் மூலஸ்தானத்தில் பவளக்கனிவாய் பெருமாள் எழுந்தருளியுள்ளதால் நேற்று மாலை ஆறு மணிக்கு கம்பத்தடி மண்டபத்திலிருந்து மடப்பள்ளி மண்டபம் செல்லும் வழியில் உள்ள பெரிய கதவிற்கு சந்தனம், மாலை சாத்துபடியாகி பூஜைகள் முடிந்து திறக்கப்பட்டு பவளக்கனிவாய் பெருமாள் எழுந்தருளினார். திருநகர் சித்தி விநாயகர் கோயிலில் தனி சன்னதியில் எழுந்தருளியுள்ள மூலவர் ஸ்ரீதேவி பூமாதேவி சமேத ஸ்ரீநிவாசப் பெருமாளுக்கு சிறப்பு புஷ்ப அலங்காரமாகி விஸ்வரூப தரிசனம் நடந்தது. காலை 5:30 மணிக்கு சொர்க்கவாசல் திறக்கப்பட்டது. உற்சவர்கள் சயன கோலத்தில் அருள்பாலித்தனர். இரவு கருட வாகனத்தில் கோயிலுக்குள் சுவாமி புறப்பாடாடு நடந்தது.

மகாலட்சுமி நெசவாளர் காலனி பெருந்தேவி தாயார் சமேத பிரசன்ன வரதராஜ பெருமாள் கோயிலில் மூலவருக்கு சிறப்பு பூஜைகள் முடிந்து உற்சவர்கள் சயன கோலத்தில் அருள்பாலித்தனர். இரவு பரமபத வாசல் திறக்கப்பட்டு சுவாமி புறப்பாடு நடந்தது. பாண்டியன் நகர் கல்யாண விநாயகர் கோயிலில் மூலவர் லட்சுமி நாராயண பெருமாளுக்கு அபிஷேகங்கள், பூஜைகள் முடிந்து சொர்க்கவாசல் திறக்கப்பட்டது. திருநகர் ஸ்ரீ்நிவாசாநகர் ஸ்ரீதேவி பூதேவி சமேத ஸ்ரீநிவாசப் பெருமாளுக்கு சிறப்பு அபிஷேகங்கள், பூஜைகள் முடிந்து உற்சவர்கள் சயன கோலத்தில் அருள்பாலித்தனர்.