திருப்புவனம்: திருப்புவனம் பூமாரி ரேணுகாதேவி அம்மன் கோயில் பங்குனி திருவிழாவின் ஆறாம் நாள் விழாவான பூச்சொரிதல் விழா வெகு சிறப்பாக நடந்தது. திருப்புவனம் நகரின் காவல் தெய்வமான பூமாரி ரேணுகாதேவி ஆலயத்தில் வருடம் தோறும் பங்குனி திருவிழா பத்து நாட்கள் வெகு விமரிசையாக நடைபெறும், இந்தாண்டு திருவிழா கடந்த திங்கட்கிழமை 13ம் தேதி இரவு கொடியேற்றத்துடன் தொடங்கியது. தினசரி பல்வேறு வாகனங்களில் அம்மன் வீதியுலா வந்து பக்தர்களுக்கு காட்சியளித்தார். ஆறாம் நாள் விழாவான இன்று பூச்சொரிதல் விழாவை முன்னிட்டு நகரின் பல்வேறு பகுதிகளில் இருந்தும் பக்தர்கள் தாமரை, மல்லிகை, பிச்சி, செவ்வந்தி உள்ளிட்ட பூக்கூடைகளை பெண்கள் சுமந்து ஊர்வலமாக வந்து அம்மனுக்கு அபிஷேகம் செய்தனர். பக்தர்கள் பலரும் ஆர்வத்துடன் விழாக்களில் பங்கேற்று அம்மனை தரிசனம் செய்தனர்.பாதுகாப்பு ஏற்பாடுகளை மானாமதுரை டி.எஸ்.பி., கண்ணன் தலைமையில் போலீசார் செய்து வருகின்றனர்.