உளுந்தூர்பேட்டை: கூவாகம் கூத்தாண்டவர் கோவில் திருவிழா பாதுகாப்பு பணியில் 1000 போலீசார் ஈடுபடுத்தப்பட்டுள்ளனர்.

கள்ளக்குறிச்சி மாவட்டம் உளுந்தூர்பேட்டை தாலுகா கூவாகம் கூத்தாண்டவர் கோவில் சித்திரை திருவிழா கடந்த 18ம் தேதி சாகை வார்த்தல் விழாவுடன் துவங்கியது. நேற்று மாலை கம்பம் நிறுத்துதல், இன்று(2ம் தேதி) இரவு சுவாமி திருக்கண் திறத்தல், திருநங்கைகள், பக்தர்கள் திருமாங்கல்யம் ஏற்றுக் கொள்ளுதல் (தாலி கட்டுதல்) நிகழ்ச்சி நடக்கிறது. நாளை (3ம் தேதி) காலை 6.30 மணியளவில் தேரோட்டம் நடக்கிறது. மாலை பந்தலடி பாரதம் படைத்தல், இரவு காளி கோவிலில் உயிர் பெறுதல், 4ம் தேதி விடையாத்தி, 5ம் தேதி தர்மர் பட்டாபிஷேகத்துடன் விழா நிறைவு பெறுகிறது. இந்த விழாவையொட்டி அசம்பாவிதங்களை தடுக்கும் விதமாகவும், பாதுகாப்பு அளிக்கும் வகையில் கள்ளக்குறிச்சி மாவட்ட எஸ்.பி., மோகன்ராஜ், கடலூர் மாவட்ட எஸ்.பி., ராஜாராமன் தலைமையில் 4 ஏ.டி.எஸ்.பி.,க்கள், 11 டி.எஸ்.பி. , க்கள், 48 இன்ஸ்பெக்டர்கள், 127 சப் இன்ஸ்பெக்டர்கள் மற்றும் போலீசார் என ஆயிரம் போலீசார் பாதுகாப்பு பணியில் ஈடுபடுத்தப்பட்டுள்ளனர்.