தேவகோட்டை; கண்டதேவி சொர்ணமூர்த்தீஸ்வரர் கோயிலில்ஆனித்திருவிழா நடைபெற்று வருகிறது. ஒன்பதாம் நாளான இன்று ஆனி கேட்டை நட்சத்திரத்தில் தேரோட்டம் 18 ஆண்டுகளுக்கு பிறகு நடைபெற்றது.

தேவகோட்டை அருகே கண்டதேவியில் சிவகங்கை சமஸ்தானத்தின் சொர்ண மூர்த்தீஸ்வரர் கோவில் மாம்பழத் திருவிழா எனும் ஆனித்திருவிழா கொடியெற்றத்துடன் துவங்கி நடைபெற்று வருகிறது. ஜூன் 17 ந்தேதி திருக்கல்யாணமும், இன்று 21ம் தேதி தேரோட்டமும் நடைபெற்றது. முன்னதாக இன்று காலை சிறப்பு அலங்காரத்தில் சுவாமி தேரில் எழுந்தருள சிறப்பு வழிபாடு நடைபெற்றது. தொடர்ந்து பக்தர்கள் வடம் பிடிக்க தேரோட்டம் சிறப்பாக நடைபெற்றது. இதில் ஏராளமான பக்தர்கள் கலந்து கொண்டனர். எப்போதும் மாலை நேரத்தில் தேரோட்டம் நடக்கும். இந்தாண்டு காலை 7:00 மணிக்கு தேர் வடம் பிடித்தல் நடைபெற்றது. தேர் சுற்றி வந்து கோயில் எதிரிலுள்ள வழக்கமான இடத்தில் நிலை நிறுத்தப்படும். இதனைத் தொடர்ந்து பக்தர்கள் தேரில் சொர்ண மூர்த்தீஸ்வரர் பெரியநாயகி அம்மனை வழிபட வசதியாக மாலை 5:00 மணி வரை சுவாமி, அம்மன் தேரிலேயே வீற்றிருப்பர். பக்தர்கள் அர்ச்சனை செய்து கொள்ளலாம். கண்டதேவிக்குள் செல்பவர்கள் சோதனைக்கு பிறகே அனுமதிக்கப்படுவர்.