தொண்டாமுத்தூர்; ஆயிரம் ஆண்டு பழமை வாய்ந்த கோவிலாக, பேரூர் பட்டீஸ்வரர் கோவில் விளங்கி வருகிறது. இக்கோவிலில், மார்கழி திருவாதிரை உற்சவ திருவிழா, ஆண்டுதோறும் வெகு விமர்சையாக கொண்டாடப்படும்.

இந்தாண்டு, மார்கழி திருவாதிரை உற்சவ திருவிழா, கடந்த 4ம் தேதி, காப்பு கட்டுதலுடன் துவங்கியது. பத்து நாட்கள் நடக்கும் இத்திருவிழாவின், 9 நாட்களும், காலையும், மாலையும் திருவெம்பாவை உற்சவம், மாணிக்கவாசகர் திருவீதியுலா நடந்தது. ஒன்பதாம் நாளான நேற்று இரவு, கிளி வாகன சேவை, அன்னூஞ்சல் நடத்தப்பட்டு, சோமாஸ்கந்தர் திருவீதியுலா நடந்தது. இன்று அதிகாலை, 3:30 மணிக்கு நடை திறக்கப்பட்டு, 4:30 மணிக்கு, நடராஜ பெருமானுக்கு, 30 வகையான மங்கள திரவியங்கள் கொண்டு, அபிஷேகம் செய்யப்பட்டது. காலை, 8:00 மணிக்கு, ஆருத்ரா தரிசன காட்சியும், அதனைத்தொடர்ந்து, சுவாமி திருவீதியுலாவும் நடைபெற்றது. ஏராளமான பக்தர்கள் தரிசனம் செய்தனர்.