துறையூர்: ஸ்ரீதேவி, பூதேவி சமேத ஸ்ரீசத்ய நாராயண பெருமாள் கோவிலில் துவங்கிய, 18வது ஆண்டு அனுமந்த் ஜெயந்தி விழா, 12ம் தேதி வரை நடக்கிறது. துறையூர் ஆத்தூர் ரோட்டில் உள்ள சத்ய நாராயண பெருமாள் கோவிலில், எழுந்தருளியுள்ள ஸ்ரீபக்த ஆஞ்சநேய ஸ்வாமிக்கு, அனுமந்த் ஜெயந்தி விழா, கடந்த, நான்காம் தேதி துவங்கியது. விழாவானது வரும், 12ம் தேதி வரை நடக்கிறது. ஒவ்வொரு நாளும் காலை, ஏழு மணிக்கு திருமஞ்சனம், எட்டு மணிக்கு தீர்த்த பிரசாதம், மாலை, ஆறு மணிக்கு பிரசாதம் வழங்கும் நிகழ்ச்சி நடைபெறும். முதல் நாள் மாலை. 5.30 மணிக்கு பழங்கள் அலங்காரத்திலும், இரண்டாவது நாள் ராஜ அலங்காரத்திலும் ஸ்வாமி காட்சி தந்தார். நேற்று செந்தூரம் அலங்காரத்திலும், நாளை சந்தன காப்பு அலங்காரத்திலும், எட்டாம் தேதி தானியங்கள் அலங்காரத்திலும், ஒன்பதாம் தேதி வெற்றிலை மாலை அலங்காரத்திலும், பத்தாம் தேதி புஷ்பாஞ்சலி அலங்காரத்திலும், ஸ்வாமி காட்சி தர உள்ளார். வரும், 11ம் தேதி அனுமந் ஜெயந்தியையொட்டி, காலை ஸ்வாமிக்கு வடைமாலை சாற்றி வழிபாடு செய்யப்படும். மாலையில் வெண்ணைக்காப்பு அலங்காரம் செய்யப்படவுள்ளது. வரும் 12ம் தேதி மாலை காய்கறி அலங்காரமும், தொடர்ந்து தீர்த்த பிரசாதம் விடையாற்றி விழாவுடன் நிறைவுறும். விழா ஏற்பாடுகளை சீனிவாச ஐயங்கார் குமாரர்கள் மற்றும் பக்தர்கள் செய்து வருகின்றனர்.