திருப்பதி; கலியுகத்தின் கண்கண்ட தெய்வமும், திருமலையின் அதிபதியுமான ஸ்ரீ வெங்கடேசப் பெருமானின் வருடாந்திர பிரம்மோற்சவ விழாவின் ஐந்தாம் நாளான இன்று சனிக்கிழமை இரவு, கருட சேவை வெகு விமரிசையாக நடைபெற்றது. ஸ்ரீதேவி மற்றும் பூதேவி சமேதராக ஸ்ரீ மலையப்ப சுவாமி, மிக அழகாக அலங்கரிக்கப்பட்ட கருட வாகனத்தில் எழுந்தருளி பக்தர்களுக்கு அருள்பாலித்தார். லட்சக்கணக்கான பக்தர்கள் தரிசனம் செய்தனர்.

கம்பீரமான யானைகள் முன்னால் செல்ல, பஜனைக் குழுக்கள், கோலாட்டம் ஆடுபவர்கள், ஜீயங்கர்களின் வேத கோஷங்கள் மற்றும் மங்கள வாத்தியங்களின் இசையுடன், ஆழ்ந்த பக்திப் பரவச சூழலில் இறைவனின் திருவீதி உலா நடைபெற்றது. ஒவ்வொரு அடியிலும் பக்தர்கள் கற்பூர ஆரத்தி எடுத்து, "கோவிந்தா... கோவிந்தா..." என்று முழங்கியபடியே பெருமாளை தரிசித்தனர். இந்த கருட சேவையில் மூலவரே வலம் வருவதாக பக்தர்கள் கருதுகின்றனர்.

கருட சேவையின் முக்கியத்துவம்; 108 வைஷ்ணவ திவ்ய தேசங்களிலும் கருட சேவைக்கு அளப்பரிய ஆன்மீக முக்கியத்துவம் உண்டு. கருடன் ஞானம் மற்றும் வைராக்கியத்தின் வடிவமாகப் போற்றப்படுகிறார். கருட வாகனத்தில் எழுந்தருளியிருக்கும் இறைவனைத் தரிசிப்பது அனைத்துப் பாவங்களையும் போக்கி, ஞானத்தையும் ஆன்மீகப் பற்றின்மையையும் அருளும் என்பது பக்தர்களின் நம்பிக்கையாகும்.

இந்தக் கருட சேவையில் திருமலை பெரிய ஜீயர் சுவாமி, சின்ன ஜீயர் சுவாமி, தேவஸ்தான தலைவர் பி.ஆர். நாயுடு, செயல் அதிகாரி முத்தாடா ரவிச்சந்திரா, பல வாரிய உறுப்பினர்கள், கூடுதல் செயல் அதிகாரி  சி. வெங்கய்ய சௌத்ரி, மாவட்ட ஆட்சியர் வெங்கடேஷ்வர், இணை செயல் அதிகாரிகள் சரத் மற்றும்  பிரபலா கோபிநாத், மாவட்ட காவல் கண்காணிப்பாளர் சுப்பராயுடு, சிவிஎஸ்ஓ முரளிகிருஷ்ணா, எஸ்விபிசி தலைவர்  ஸ்ரீதர் வர்மா மற்றும் பலர் கலந்துகொண்டனர்.