சென்னை: வடபழனி முருகன் கோவிலில், நவராத்திரி சக்தி கொலுவின் நான்காம் நாளான நேற்று, அபிராமி அலங்காரத்தில் அம்மன் பக்தர்களுக்கு அருள்பாலித்தார்.

சென்னையில் பிரசித்தி பெற்ற வடபழனி முருகன் கோவிலில், நவராத்திரியை முன்னிட்டு ஒன்பது படிகளுடன் நான்கு திசைகளிலும் சக்தி கொலு அமைக்கப்பட்டுள்ளது. ஹிந்து மதத்தின் வழிபாட்டு முறைகள், தெய்வங்களின் பல்வேறு வடிவங்கள் குறித்த தகவல்கள் பொதுமக்கள் அறிந்துகொள்ளும் வகையில், கொலு வடிவமைக்கப்பட்டுள்ளது. நேற்று காலை, மாலை சிறப்பு பூஜைகள், தீபாராதனை நடைபெற்றன. மாலையில் அம்மனுக்கு அபிராமி அலங்காரம் செய்யப்பட்டு, லலிதா சகஸ்ரநாமம், வேதம், திருமுறை பாராயணங்கள், மகளிர் குழுவினரின் கொலு பாடல்கள் நடைபெற்றன. ஏராளமான பக்தர்கள் பங்கேற்றனர். சிறார்களை ஊக்குவிக்க தினமும் அறிவுத்திறன் போட்டிகள் நடத்தி பரிசுகள் வழங்கப்பட்டு வருகின்றன.