சேலம்: சேலம் நெத்திமேடு, மணியனூர் மகா காளியம்மன் கோவிலில், சித்திரை திருவிழா, நேற்று பூச்சாட்டுதலுடன் துவங்கியது. சேலம் நெத்திமேட்டிலும், மணியனூரிலும் பிரசித்தி பெற்ற மகா காளியம்மன் கோவில் அமைந்துள்ளது. இக்கோவிலில், ஆண்டுதோறும் சித்திரை மாதம், திருவிழா நடத்தப்படுகிறது. இந்த ஆண்டு திருவிழா, நேற்று இரவு பூச்சாட்டுதலுடன் துவங்கியது. அதையொட்டி, அப்பகுதியில் உள்ள பெண்கள் கூடைகளில் பூக்களை சுமந்து வந்து, அம்மனுக்கு போட்டு வழிபட்டனர். இன்று மதியம், 12 மணிக்கு அபிஷேகமும், இரவு, 8 மணிக்கு துர்கா அலங்காரமும், 18ம் தேதி லட்சுமி அலங்காரம், 19ம் தேதி ராஜராஜேஸ்வரி அலங்காரத்திலும் அம்மன் அருள்பாலிக்கிறார். 20ம் தேதி, 10 சங்காபிஷேகம் சிறப்பு பூஜை, 21ம் தேதி இரவு 7 மணிக்கு, மீனாட்சி அலங்காரத்துடன் திருவிளக்கு பூஜை, 22ம் தேதி அர்த்தநாரீஸ்வரர் அலங்காரம் செய்யப்படுகிறது. 23ம் தேதி காலை, 9 மணிக்கு, பால்குடம் எடுத்து வருதல், 24ம் தேதி காலை, 9 மணிக்கு சக்தி அழைத்தல், 25ம் தேதி பூமிதி திருவிழா, 26ம் தேதி காலை, 10 மணிக்கு சமபந்தி விருந்து, இரவு 9 மணிக்கு சத்தாபரணம் ஊர்வலம், 27ம் தேதி காலை, 9 மணிக்கு மஞ்சள் நீராட்டு விழா உள்ளிட்ட பல்வேறு நிகழ்ச்சிகள் நடத்தப்படுகிறது. இதற்கான ஏற்பாடுகளை, கோவில் விழாக்கமிட்டியினர் செய்துள்ளனர்.