ஆர்.கே.பேட்டை : விளக்கணாம்பூடியில் புதுப்பிக்கப்பட்டுவரும் கமல விநாயகர் கோவிலில், 29ம் தேதி, கும்பாபிஷேகம் நடத்த முடிவு செய்யப்பட்டுள்ளது. இதற்கான யாகசாலை பூஜை, 27ல் துவங்குகிறது. ஆர்.கே.பேட்டை அடுத்த, விளக்கணாம்பூடி கிராமத்தில் அமைந்துள்ளது கமல விநாயகர் கோவில். இந்த கோவில் புனரமைப்பு பணிகள், இரண்டு ஆண்டுகளாக நடந்து வருகின்றன. கோவில் சுற்று பிரகாரம் மற்றும் விமான கோபுரம் அமைக்கப்பட்டு, புதுப்பிக்கப்பட்டுள்ளது.பொதுமக்கள் பங்களிப்புடன் நடந்துவரும் இந்த பணிகள் இறுதிக்கட்டத்தை எட்டியுள்ள நிலையில், 29ல் கும்பாபிஷேகம் நடத்தப்பட உள்ளது.

இதற்கான யாகசாலை பூஜை, 27ல் கணபதி பூஜையுடன் துவங்குகிறது.அன்று மாலை, 6:00 மணிக்கு, வாஸ்து சாந்தி, பிரவேச பலி, அங்குரார்ப்பணம், ரக் ஷா பந்தனம், பூர்ணாஹூதி நடக்கிறது. மறுநாள் காலை 8:30 மணிக்கு, இரண்டாம் கால யாகசாலை பூஜை, கோ பூஜையும், மாலை 6:00 மணிக்கு, அஷ்டபந்தனம் சாற்றப்படுகிறது. வரும் 29ம் தேதி, காலை, 6:30 மணிக்கு, நான்காம் கால யாகசாலை பூஜையை தொடர்ந்து புனிதநீர் அடங்கிய கலசங்கள் யாகசாலையில் இருந்து புறப்பாடு ஆகின்றன. காலை, 10:15 மணிக்கு, விமான கோபுரம் மற்றும் மூலவருக்கு கும்பாபிஷேகம் செய்யப்படுகிறது. இரவு, 8:00 மணிக்கு, உற்சவர் பெருமான், வீதியுலா எழுந்தருளுகிறார்.