ஆத்தூர்: ஆத்தூரில், சீதாராமர் பஜனைமடம், பட்டாபிராமர் பஜனைமடம், புதுப்பேட்டை மகா மாரியம்மன், திரவுபதி அம்மன், கன்னிகா பரமேஸ்வரி அம்மன் கோவில் நிர்வாக குழுவினர் சார்பில், பக்தி திருவிழா, நேற்று நடந்தது. அதில், ஸ்ரீஸ்ரீமுரளிதர சுவாமிகள் பேசியதாவது: நாம், இறைவனின் குழந்தை என்பதால், அவரிடம் வேண்டுதல் வைத்தால், கோரிக்கைகள் நிறைவேறும். மனிதனை வலிமையாக, ஆரோக்கியமாக வைத்திருப்பது ஆன்மிகம் தான். ராமானுஜர், ஆதிசங்கரர், மத்வர் போன்ற சம்ப்ரதாய ஸ்தாபகர்கள், சிவ பக்தி செய்த நாயன்மார்கள், விஷ்ணு பக்தி செய்த ஆழ்வார்கள், இறைவனை ஜோதி வடிவமாக அனுபவித்த வள்ளலார் போன்றோர், ஆன்மிக வழிபாடு சிறந்தது என எடுத்துரைத்தனர். மன அமைதி, உலக அமைதிக்கு, ஆன்மிக வழிபாடு ஒன்றே சிறந்த வழி. ஹரே ராம, ஹரே கிருஷ்ணா என உச்சரித்து வந்தாலே நன்மை ஏற்படும். இவ்வாறு அவர் பேசினார்.