மேல்மருவத்துார்: ஆதிபராசக்தி சித்தர் பீடத்தில், பங்காரு அடிகளார் பிறந்த நாளையொட்டி, உலக நன்மைக்காக சிறப்பு வேள்வி பூஜை நடந்தது. மேல்மருவத்துார் ஆதிபராசக்தி சித்தர் பீட, பங்காரு அடிகளாரின், 78வது பிறந்த நாள் விழா, நேற்று துவங்கி, 3ம் தேதி வரை நடக்கிறது. நேற்று அதிகாலை, 3:00 மணிக்கு மங்கல இசையுடன், ஆதிபராசக்தி அம்மனுக்கு சிறப்பு அபிஷேகம் நடந்தது. தமிழகம் மட்டும் இன்றி, பல்வேறு மாநிலங்களிலிருந்து கொண்டு வரப்பட்ட, அடிகளார் பிறந்த நாள் ஆன்மிக ஜோதி, கோவிலை வந்தடைந்தது. இதை, ஆதிபராசக்தி ஆன்மிக இயக்க துணை தலைவர் செந்தில்குமார் வரவேற்றார். இதையடுத்து, உலக நன்மைக்காக, 78 யாககுண்டங்களில், சிறப்பு கலச வேள்விக்கு பூஜை நடந்தது. ஆன்மிக இயக்க தலைவர் லட்சுமி பங்காரு அடிகளார் துவக்கி வைத்தார். விழா ஏற்பாடுகளை, ஆதிபராசக்தி ஆன்மிக இயக்கம் மற்றும் சேலம், நாமக்கல் மாவட்டங்களைச் சேர்ந்த ஆதிபராசக்தி சக்தி பீடங்கள் மற்றும் வழிபாட்டு மன்றத்தினர் செய்திருந்தனர்.