ஸ்ரீரங்கம் கோயிலின் உபகோயிலாக திகழ்கிறது காட்டழகிய சிங்கப்பெருமாள் கோயில். கடன் தொல்லையால் அவதியுறுபவர்கள். தொழில் தடைகள் நீங்க நினைப்பவர்கள் இக்கோயிலுக்கு வந்து அழகியசிங்கரை வழிபட்டால் உடனடியாக கைமேல் பலன் கிடைக்கும் என்பது ஐதீகம். பல யுகங்களுக்கு முன்பு இப்பகுதி காடாக இருந்த போது, ரிஷிகள் தியானம் செய்ய முடியாத அளவுக்கு வன விலங்குகளின் தொல்லை அதிகமாக இருந்துள்ளது. இதனால், தவத்துக்கு ஏற்ற தலமாக இதனை மாற்றித்தரும்படி ரிஷிகள் பெருமாளை வேண்டியுள்ளனர். ரிஷிகளின் வேண்டுகோளை ஏற்று நரசிம்ம பெருமாள் அவதரித்தாகவும், பெருமாளே தனக்காக ஒரு கோயில் அமைத்து, அதனை தானே வழிபட்டதாகவும் கூறப்படுகிறது. ஸ்ரீரங்கம் மற்றும் திருவானைக்காவல் ஆகிய கோயில்களின் எல்லை தெய்வமாகவும் இந்தப் பெருமாள் விளங்கி வருகிறார்.

இந்த காட்டழகிய சிங்கர் மேற்கு நோக்கிய திருமுகத்துடன், இடது தொடையில் லட்சுமி தேவியை அமர வைத்து சாந்தமாகக் காட்சியளிக்கிறார். இதனால், ‘லட்சுமி நரசிம்மர்’ என அழைக்கப்படுகிறார். பெருமாளின் ஜன்ம நட்சத்திரமான சுவாமி நட்சத்திர தினம், பிரதோஷ தினம் மற்றும் ஒவ்வொரு வாரமும் செவ்வாய்க்கிழமைகளில் பக்தர்கள் துளசி, பழங்களை வைத்து படையல் போட்டு வழிபட்டு வருகின்றனர். வெல்லம், சுக்கு கலந்த பானகம் சுவாமிக்கு நைவேத்தியமாகப் படைக்கப்படுகிறது.