முதலில் கருவறையுடன் சிறிய கோயிலாக திகழ்ந்தது இன்று பெருங்கோயிலாக உள்ளது. சோழர் காலச் சிற்பங்கள் மற்றும் சில கல்வெட்டுகள் மூலம் ஆலயச் சரித்திரம் தெரியவருகிறது. இன்னும் சில கல்வெட்டுகள், கோயிலுக்கு வழங்கப்பட்ட நிவந்தங்கள் குறித்துத் தெரிவிக்கின்றன. விஜயநகர திருப்பணிகளும் இந்தக் கோயிலுக்கு உண்டு.

கருவறையில் கோதண்டபாணியாய் அழகு கோலம் காட்டுகிறார் ராமச்சந்திர மூர்த்தி. இடது கையில் கோதண்டமும் வலது கையில் ராம பாணமும் ஏந்தியுள்ளார். வலப்புறம் லட்சுமணனும், இடப்புறத்தில் சீதையும் உள்ளனர். இந்தக் கோதண்டபாணியை ஒருமுறை தரிசிக்க, சத்ரு தொல்லைகள் யாவும் நீங்கும். இங்குள்ள ஆஞ்சநேயர், அஞ்சலி ஹஸ்தத்துடன் தனிச் சன்னதி கொண்டிருக்கிறார்; ஆதிசேஷன் குடைபிடிக்க அமர்ந்த கோலத்தில் இருக்கும் ஸ்ரீதேவி - பூதேவி சமேத நாராயணரையும் இங்கு தரிசிக்கலாம். பாஞ்சராத்ர முறைப்படி பூஜைகள் நிகழும் இந்த ஆலயத்தில், ஸ்ரீராம நவமி விசேஷமாகக் கொண்டாடப்படுகிறது.