தேவிபட்டினம் : நவபாஷாண கோயிலில் தை அமாவாசை நாளில் கூட்ட நெரிசலில் இருந்து பக்தர்களை பாதுகாக்க கம்பால் பேரி கார்டுகள் அமைக்கும் பணியை அறநிலையத் துறை அதிகாரிகள் மேற்கொண்டுள்ளனர்.

தேவிபட்டினம் கடலுக்குள் அமைந்துள்ள நவபாஷாணத்தில் திருமண தடை, குழந்தை பாக்கியம் உள்ளிட்டவைகளுக்கு நிவர்த்தி வேண்டியும், முன்னோர்களுக்கு தர்பணம் செய்யவும், பல்வேறு பரிகார பூஜைகள் செய்வதற்காக தினமும் உள்ளூர் மட்டுமின்றி வெளி மாநிலங்களில் இருந்தும் ஏராளமான பக்தர்கள் வந்து செல்கின்றனர்.இங்கு ஆடி, தை அமாவாசையில் முன்னோர்களுக்கு திதி கொடுப்பதற்காக ஆயிரக் கணக்கான பக்தர்கள் நவபாஷாணம் வந்து கடலில் புனித நீராடி செல்வது வழக்கம்.

இதனால் இந்த நாட்களில் பக்தர்களின் கூட்டம் ஆண்டுக்கு ஆண்டு அதிகரித்த வண்ணம் உள்ளது. நாளை (ஜன.24 ) தை அமாவாசை என்பதால் நவபாஷாணம் வரும் பக்தர்களின் பாதுகாப்பு கருதி, இந்து அறநிலையத்துறை சார்பில், நவகிரகம் அமைந்துள்ள கடல் பகுதி வரை கம்பால் பேரிகார்டுகள் அமைத்து தனித்தனி வழிகள் ஏற்படுத்தப்பட்டுள்ளன.இதனால் பக்தர்கள் சிரமமும் இன்றி நீராடும் நிலை ஏற்படும், என நவபாஷாண கோயில் அலுவலர்கள் தெரிவித்தனர்.