செவ்வாயுடன் வக்ரம் பெற்ற யுரேனஸ் இணைந்திருப்பது உலக நாடுகளுக்கு இடையே போட்டி, பொறாமையை 2021 ல் உண்டாக்கும். நீசம் பெற்ற குருவுடன் சனி இணைவது பொருளாதார ரீதியான சரிவை ஏற்படுத்தலாம். சுக்ரனுடன் உச்சம் பெற்ற கேது இணைவது மக்களின் மனதில் அற்ப ஆசைகளை ஏற்படுத்தும். சுக்ரன், கேதுவின் இணைவு தனி மனித ஒழுக்கத்தின் மீதான சந்தேகத்தை ஏற்படுத்தும்.

இந்த இணைவு ஒரு மாதத்திற்குள் முடிந்து விடும் என்பதால் கவலை தேவையில்லை. சூரியனும், புதனும் இணைந்திருப்பதும், சந்திரன் ஆட்சி பலம் பெறுவதும் பல்வேறு பிரச்னைகளுக்கு இடையே உணவுப் பஞ்சம் ஏற்படாமல் மக்களை பாதுகாக்கும். அரசியல் தலைவர்களின் குடும்பங்களில் குழப்பம் நிலவும். விளையாட்டுத்துறை பலவீனம் அடையும் ஐரோப்பிய நாடுகளில் மதம் சார்ந்த புதியதொரு மாற்றம் உருவாகக் கூடும். அறிவியல் துறை வளர்ச்சி பெறும். எலக்ட்ரானிக்ஸ் துறையில் புதிய கண்டுபிடிப்புகள் தோன்றி மக்களின் வாழ்வியல் முறையை எளிதாக்கும். தகவல் மற்றும் தொழில்நுட்பத் துறையில் புதிய புரட்சி உருவாகும்.

விவசாயிகள் வளம் பெறுவர்: சனி, சந்திரனின் ஆட்சி பலம் பெறுவதால் உணவு உற்பத்தியில் வளர்ச்சி ஏற்படும். விவசாயிகள் வளம் பெறுவர். விளைபொருட்களுக்கு உரிய விலை கிடைக்கும். பசுமைப்புரட்சி என்பதற்கான உண்மையான பொருளை அனுபவ பூர்வமாக உணரலாம். உணவுப் பொருட்களில் கலப்படம் செய்வோர் அடையாளம் காணப்பட்டு தண்டிக்கப்படுவர். இயற்கையைப் பாதுகாக்கும் எண்ணம் அதிகரிக்கும். மரம் நடுதல், நீர்நிலைகளை பாதுகாத்தல் போன்ற பொதுப்பணிகளில் மக்கள் ஆர்வமுடன் ஈடுபடுவர். மழை அதிகரிக்கும்.

சனியின் ஆட்சி பலம் ஏழைகளின் வாழ்க்கைத் தரம் உயர்வதற்கு துணை புரியும். காய்கறிகள், விளை பொருட்களின் விலை கட்டுக்குள் இருக்கும். தொழிலாளர்களின் குடும்பம் முன்னேற்றம் பெறும். குரு நீசபலம் பெறுவதால் கல்வியாளர்கள், நீதிமான்கள், ஆச்சார சீலர்களுக்கு உரிய மரியாதை கிடைக்காது. குறிப்பாக சுப கிரகங்களின் வலிமை குறைந்து அசுப கிரகங்களின் வலிமை கூடுவதால் நீதி, நேர்மை, நாணயத்தை கடைபிடிப்பவர்களுக்கு சோதனை காலமாக அமையும்.நல்லவர்களின் வார்த்தை மற்றவர் மத்தியில் எடுபடாது.

பெண்கள் கவனம்: கேதுவின் உச்ச பலமும், குருவின் நீச பலமும் மலட்டுத்தன்மையை ஏற்படுத்தும். செயற்கை கருத்தரிப்பு மூலம் பிறக்கும் குழந்தைகளின் எண்ணிக்கை அதிகரிக்கும். பெண்கள் பொது இடங்களில் எச்சரிக்கையாக இருக்க வேண்டும். சனியின் பலம் கூடுவதால் திருடர்களுக்கு பலம் அதிகரிக்கும். அதே நேரத்தில் செவ்வாயின் பலம் உயர்வதால் காவல்துறையினர் உடனுக்குடன் குற்றவாளிகளைக் கண்டுபிடிப்பர். குற்றம் நடந்த பிறகு கண்டுபிடிப்பதை விட, குற்றம் நடக்காமல் தடுக்க தெய்வ வழிபாட்டில் ஈடுபடுவது நன்மை தரும்.

விமான விபத்து, ரயில் விபத்துக்களால் பெருத்த சேதம் நிகழும். அசுப கிரகங்கள் வலிமை பெறுவதால் விரும்பத்தகாத சம்பவங்கள் அதிகம் நடந்தாலும் நன்மைகளும் நடக்கவே செய்யும். செவ்வாய், ராகுவின் நிலையால் நாடுகளுக்கு இடையே பிரச்னை தோன்றினாலும் இந்தியா படைபலத்தில் வலிமை மிக்கதாக இருக்கும். காவல் துறையினர், ராணுவத்தினர், சட்டம் ஒழுங்கைநிர்வகிப்பவர்கள் அதிக பலம் பெறுவர். இந்திய மாணவர்கள் சர்வதேச அளவில் முன்னிலை வகிப்பர். ஆராய்ச்சியாளர்கள் புதிய சாதனைகளைப் படைப்பர். தொழிலாளர்களின் பலம் கூடுவதால் தொழிலதிபர்களும் ஏற்றம் பெறுவர்.

பொருட்கள் விலை குறையும்: ரியல் எஸ்டேட் துறை வளர்ச்சி பெறும். கட்டுமானப் பணிகள் வளர்ச்சி பெறும் கட்டிடத் தொழிலாளர்கள் நற்பலன் பெறுவர். வாகனங்களின் விற்பனை அதிகரிக்கும். தங்கத்தில் முதலீடு செய்வோரின் எண்ணிக்கை குறையும். ஷேர் மார்க்கெட் வீழ்ச்சி பெறும். அன்றாட வாழ்விற்குத் தேவையான அத்யாவசியப் பொருட்களின் விலை குறையவும், ஆடம்பரப் பொருட்களின் விலை உயரவும் செய்யும். உலகளவில் பொருளாதாரம் வீழ்ச்சியடைந்தாலும் நம் நாட்டைப் பொறுத்தவரை பெருத்த மாறுதல் ஏற்படாது.சென்ற ஆண்டு வலுவிழந்த பயங்கரவாதம் தலையெடுக்க வாய்ப்புண்டு. மேற்கத்திய நாடுகளில் கலவரம், குண்டுவெடிப்பு, உயிரிழப்புகள் ஏற்படும். இந்தியாவில் பெருத்த சேதம் தரக்கூடிய தீ விபத்துக்கள் ஏற்படும். அஜாக்கிரதை, மெத்தனப்போக்கால் இழப்புகள் சந்திக்கலாம் என்பதால் மக்கள் விழிப்புடன் செயல்படுவது அவசியம்.

இந்தியாவில் புதிய தொழிற்சாலைகள் உருவாகும். தொழில்நுட்ப வல்லுநர்கள் சாதனைகளைப் படைப்பர். தொழிலாளிகள் முன்னேற்றம் காண்பர். மக்கள் மத்தியில் அரசியல் தலைவர்களின் மதிப்பு குறையும். சித்த மருத்துவம், ஆயுர்வேத மருத்துவ முறைகள் புத்துயிர் பெறும். யோகாசனம், தியானப் பயிற்சிகள் பிரபலம் அடையும். கிரகங்களின் தாக்கம் ஒருபுறம் இருந்தாலும் கூட பாரத பூமி புண்ணிய பூமி. இந்தியத் திருநாட்டில் பிறக்கும் ஒவ்வொருவரும் புண்ணியம் செய்தவர்கள்; இங்கே பாவம் செய்தவர்கள் பிறப்பதில்லை என்னும் ஆன்மிகவாதிகளின் சிந்தனையை கருத்தில் கொண்டு நம் பாரத பண்பாட்டை காப்பதில் அக்கறை கொள்வோம்.
2021 ஆங்கில புத்தாண்டு தங்களின் விருப்பங்களை நிறைவேற்றும் ஆண்டாக அமைய வாழ்த்துக்கள்!

* தங்கத்தில் முதலீடு செய்வது குறையும்

* அத்தியாவசிய பொருட்களின் விலை குறையும்
* விளைபொருட்களுக்கு உரிய விலை கிடைக்கும்
* புதிய தொழிற்சாலைகள் உருவாகும்
* ஆராய்ச்சியாளர்கள் சாதனைகள் படைப்பர்
* இந்திய மாணவர்கள் சர்வதேச அளவில் முன்னிலை வகிப்பர். கே.பி. ஹரிபிரசாத் சர்மா