திருப்புத்துார்: பிள்ளையார்பட்டி கற்பக விநாயகர் கோவிலில், சதுர்த்தி விழா நேற்று கொடியேற்றத்துடன் துவங்கியது.

சிவகங்கை மாவட்டம், பிள்ளையார்பட்டி விநாயகர் கோவிலில் நேற்று காலை, மூலவர் தங்கக் கவசத்தில் எழுந்தருளினார். 10:30 மணிக்கு கொடிமரம் அருகே உற்ஸவ விநாயகர், சண்டிகேஸ்வரர், அங்குசத்தேவர் எழுந்தருளினர்.தொடர்ந்து, பிச்சை குருக்கள் தலைமையில், கொடிமரத்திற்கு பூஜை நடந்தது. காலை 11:30 மணிக்கு கொடியேற்றம் நடந்தது. கொடிமரத்திற்கு சிறப்பு அலங்கார தீபாராதனை நடந்தது. மாலையில் வெள்ளி மூஷிக வாகனத்தில், உற்ஸவ விநாயகர் எழுந்தருளினார். இன்று காலை வெள்ளிக் கேடகத்தில் விநாயகர் எழுந்தருளலும், இரவில் விநாயகர் பிரகாரம் வலம் வருதலும் நடக்கிறது. வரும் 10ம் தேதி சதுர்த்தி பெருவிழா நடக்கிறது.